Russian sipaiten Ukraine-a Pokrovsk an lut tan
Russian defence ministry chuan an sipaiten Ukrainian khawpui, Pokrovsk an lut mek zel a, in tinah lutin Ukrainian sipaite khawpui atanga hnawh chhuah vek tumin hma an la tih a sawi.
Moscow chuan Russian chanchinbuten ‘the gateway to Donetsk’ tia an sawi, Pokrovsk hi hmar lam pana Ukrainian-ten Donetsk region-a khawpui an la thunun pahnih, Kramatorsk leh Sloviansk an pan zel theih nan lak an duh hle a ni.
Russia hian Donetsk leh Luhansk province awmna, Donbas region hi lak vek an duh a. Ukraine-in 10% chuang, sq km 5,000 chuang an la thunun mek a ni.
Pokrovsk lak tum hian kum khat chuang an bei tawh a, hualin châk lak luhna pawh eng emaw chen an thunun a, kum 2023-a sipai chakna hmanga Bakhmut khawpui an lak dan angin an bei lo a ni.
Kyiv chuan Pokrovsk dinhmun hi a khirh hle tih an sawi tawh a; mahse, an sipaiten an bei let reng a, hual vek tawha sawi pawh a nih loh thu an sawi.
“2nd Army-in central district leh khawthlang lama industry awmnaa Ukrainian Armed Forces chu an um chhuak tawh a ni,” tiin Russian defence ministry chuan Ningani khan a sawi a ni.
Russia hian mi 60,000 chenna building 64 an la tawh a, khawthlang lam, Hryshyne-a Ukrainian-ten an beih letna chu an dang let vek thei tih an sawi.
Russian sipaite hian Pokrovsk leh a thenawm, Myrnohrad chu an la vek tluk a ni tawh a, Kharkiv region-a Kupiansk-a Ukrainian sipaite awmna pawh an hnaih hle tawh niin an sawi.
Russian sipaite hian Ukraine ram 19% chuang, sq km 1,16,000 chuang an thunun tawh a. Ukrainian tantuten map an siamah pawh chuan Russia hian kuminah an ram sq km 3,400-a zau an la tawh niin an sawi.
Russian sipaiten Ukraine-a Pokrovsk an lut tan
