Russian-ten Ukraine khaw pawimawh, Pokrovsk hnaih telh telh

Russian-ten Ukraine khaw pawimawh, Pokrovsk hnaih telh telh
Ukrainian sipai commander in chief chuan ramri khua, Pokrovsk chhehvelah Russian an chetla nasa zual nia sawiin ‘dinhmun a khirh hle’ niin a sawi.
General Oleksandr Syrskyi-a hian Russian sipaite hi khaw chhehvelah an chetla nasa a, amah pawhin tlawhin an sipai commander-te pawh a kawm tih a sawi.
Hetih lai hian Rissian sipaiten Ukrainian sipaite ‘an dangchat’ nia sawi erawh ‘thu dik lo vawrh darh’ a nih thu a sawi.
Tun hnaiah Ukraine khawchhak lam, Donesk region-a khaw pawimawhah Russian-ten hma an sawn nasa tih sawi a awm a. Inkalpawhna leh mamawh inpekna hmunah an siam a, an la thei a nih chuan helai region hmun zau zawk an lak theihna tur kawng a ni thei dawn a ni.
Telegram-a thu a chhuahah General Syrskyi chuan, “Pokrovsk-ah hmelma sipaiten indo lovin hmun ualauvah an lo chhuak a, an awmhmun pawh an sawn a, an tum ber chu tute nge an nih fiaha tihchhiah a ni,” a ti.
“Dinhmun a khirh hle a; mahse, Russian-ten Pokrovsk leh Kupiansk-a Ukrainian sipaite an dang tih an sawi erawh dawt a ni,” a ti.
A commander-ten ‘an tum leh an theihna neih nena inmil tawkin hma an la zel’ tih a sawi a. “A pawimawh ber chu kan sipaite nun hum a ni,” a ti.
Russian sipaite hian Pokrovsk hi kum khat chuang lak an tum tawh a. An la thei a nih chuan khawpui lian pahnih, Ukraine-in a la thunun si, Kramatorsk leh Sloviansk la zui turin kawng a inhawng dawn a ni.
Moscow hian Ukraine hi February, 2022 atangin a bei a. Chief of General Staff Gen Valery Gerasimov-a chuan kar tirah khan Pokrovsk-a Ukrainian sipaite chu an hual vek tawh niin a sawi.
Ukrainian President Volodymyr Zelensky-a pawhin Pokrovsk hi Russia tum ber a nih thu sawiin an tam hneh a, ‘Ukrainian pakhatah pariat zel an awm’ niin a sawi.
Defence intelligence firm, Sybelline chuan Pokrovsk lak tuma inbeihna a tang hle tih an sawi a, ‘Russian sipaite a ruka khawpuiah lutin Ukrainian vengtute hual an tum’ niin a sawi.
Ukrainian monitoring group Deepstate pawhin Russian sipaite hian Pokrovsk hi ‘zawi zawiin’ an hnaih a, an tam hneh telh telh tih a sawi a. Russian-te hi a rukin khuaah an lut thuk telh telh a, Ukrainian sipai mamawh inpekna an tibuai tan tih a sawi.