Russian tuialhthei lei vanga US-in
India a hremna hlip hnai?
US Treasury Secretary Scott Bessent-a chuan India-in Russian tuialhthei a lei tlem tak avangin a hrem nana bungrua an lak luhsaka chhiah 25% a lak belh chu tihtawp a ni dawn hnai niin a sawi.
Bessent-a hian a tihtawp nghal dawn tih sawi lo mah se tihtawp a hnai ni ngeia ngaih theih turin thu a sawi a ni.
Sumdawnnaa ram pahnihte innghirnghona hi August thlaa US President Donald Trump-ah Indian bungrua an lak luh atanga chhiah an lak a leta tipunga 50% a lak atanga intan a ni a. Chhiah a laksak zinga a zahve, 25% hi India-in Russian tuialhthei thlitfim loh a lak luh nasat avanga hrem nana a tih a ni.
“Indian thlifimtuten Russian tuialhthei an leisak zat a tlahniam nasa em em a, hei hi hlawhtlinna lian tak a ni a. Russian tuialhthei an leisak avanga chhiah laksak hi 25% a la ni reng a, tihtawp dan kawng zawh mek niin a lang,” tiin Bessent-a hian Davos, Switzerland-a World Economic Forum-a Politico-in Zirtawpnia an kawmnaah a sawi a ni.
India-in Russian tuialhthei a leisak hi December khan nasa taka tlahniamin kum hnih chhunga a lei tlem ber thla a ni a. OPEC ramte atanga a leisak chu thla 11 chhunga a tam ber tum a ni thung niin sumdawnna thlithlaituten an chhinchhiah Reuters-in a tar lanah a lang.
Bessent-a’n hetiang thu a sawi mek lai hian Trump-a atang erawh chuan nawrna nasa tak a la awm a, tun hnai lawk pawh khan India hian Russian tuialhthei lei a tihtawp hmak loh chuan chhiah a laksak zat chu la tihpun theih a ni tih a sawi a ni.
US-a Trump-a sorkar hian India-in Russia atanga tuialhthei a leisakna sum hi Moscow-in Ukraine a rûn meka sum hman tur a neihna hnar pakhat niin a ngai a, hei vang hian indo tihtawp tuma hmalakna tithuanawp leh Russian puitua ngaiin hremna hi Delhi lakah a lek ta a ni.
Russian tuialhthei lei vanga US-in India a hremna hlip hnai?
