State puitlinga hlankai kan nih atanga kum 38 liam hnu pawha sa, artui leh bawnghnutea intodelh tura hma lak a ni chunga tun thlenga kan la intodelh lo chu ngaihtuah chian a tul tih AH & Vety minister C Lalsawivunga chuan a sawi.
Veterinary Diploma Holder Association (VDA) chuan Zirtawpni khan Aizawlah general conference vawi 26-na an hmang a. AH & Vety minister hian he thu hi a sawi a. Vety field assistant-te chu hemi kawnga hmalatu pawimawh tak pakhat an nih avangin intodelh tura tan lakpuiah a sawm a ni.
ASF hrileng avangin Mizoramah vawk vulhtuten harsatnate nasa tak an tawk mek tih a sawi a. AH & Vety department thawktute lakah mipuiin beiseina sang tak an nei a, ran damlo enkawl kawngah thawktuten theihtawp chhuah tlan zel a ngai,tiin, “Min mamawhtute tana biak nuam leh dawr nuam, mamawh huna che chhuak thei tura kan inpeih reng a ngai a ni,” a ti.
AH&Vety director Dr C Lalrintluanga chuan VDA post chelh theih hrang hrangah indaihlohna nasa tak awm mah se, indaihlohna lang lo khawpa phak tawka thahnemngai taka an thawk thin chu fakawm a tih thu a sawi a. Khawvel hmasawn zelah tih dan changkang zawk leh thil thar a chhuah ve zel avangin tunhma tih dan ang ngawta kal a rem loh chang pawha insiamrem thiam turin a fuih.
VDA hi 1981 May 22-a din niin, tunah hian member 129 an awm a ni.
Saa kan intodelh theih dan ngaihtuah chian a tul tawh – AH & Vety minister
![](https://theaizawlpost.org/wp-content/uploads/tap_logo-min-large.jpg)