Sabalenka barakhaihtu Sorana
Miami Open 2023 khelh mek hmeichhe singles quarter-final inkhel pakhatah Nilaini khan kum 32 mi ni tawh Sorana Cirstea chuan 6-4 6-4-a world number two Aryna Sabalenka hnehin semi-final a lut a, kum 10 zet a nghah hnuah WTA 1000 last four a lut ve leh ta chiah!
Cincinnati 2010-a semi-final a thlen hnua Madrid 2021-a last four lut ve leh chauh Anastasia Pav-lyuchenkova kha WTA 1000 semi-final a luh pahnih inkarah kum 11 a tla a, Russian dawta WTA 1000 semi-final khel chhangkhat ber chu kum 10 nghak Cirstea hi a ni.
World number 74 Sorana Cirstea hian Australian Open champion laka a career-a hnehna lian ber a sualchhuah hnuah a hun tawn chu sawifiah ngaihna pawh a hriat loh thu inkhelh ban on-court interview-ah sawiin, “Inkhel hautak a ni dawn tih hre chungin khelmual ka lut a, rin lawk ang ngeiin Aryna ball vuak kha a na thak thak khawp mai a, mahse, vawiina ka khelh danah ka hlim a, zep lohah chuan ka chak ta mai kha kei ngei pawhin ka beisei piahlam a ni,” a ti.
Romanian Cirstea tan tun kha a career-a top-three ranked player a hneh vawikhatna niin, unseeded player zinga women’s draw lama last eight lut awmchhun a ni a, he thu buatsaih laia chak zawk tarlan hman loh Czech 15th seed Petra Kvitova leh 18th-seeded Russian Ekaterina Alexandrova inkhela chak zawk zawk a tum leh ang.
Cirstea hian Miami khaw tourna-ment kal mekah set a la hloh lo a, a round hmasa lamah world number four Caroline Garcia a lo hnawtchhuak tawh bawk.
Tunthla tir lam khan a vawikhatna’n Indian Wells lamah pawh quarter-final lut tawh bawkin, world number one Iga Swiatek a ngam lo a, Miami lamah insawnin, a career-a a vawihnihna atan WTA 1000 semi-final a lut a, a hmasa zawk chu Toronto 2013 final-a Serena Williams a hneh loh kha a ni.
Rinkai zawk ni chunga last four paltlang zo ta lo kum 24 mi Saba-lenka hi kumina chetha tluang lai niin, kumin bika match 23 a khelh tawhah tun kha Belarusian vawi-thum tlawmna chiah a la ni.
Vawiin semi-final match pakhatah wimbledon champion Elena Rybakina (ranked seventh) leh American world number three Jessica Pegula an intum dawn a, Miami khaw tournament-ah hian la champion ngai loin player vekin semi-final an luh avangin hian hmeichhe champion thar kan hmu dawn a ni.
Kumin bika Cirstea aia WTA 1000 main-draw match chak tam awmchhun chu vawi 12 chak tling tawh Kazakh Rybakina chiah hi niin, Romanian Cirstea hi Sunshine Double an tih mai – Miamia leh Indian Wells-a top 50 pawn lam player ni chunga kum khat chhunga match kaw chak tling awmchhun a ni.
Hard Rock Stadium in Miami, Florida-a Nilaini men’s draw lamah Italian 10th seed Jannik Sinner chuan ruahsur vanga darkar hnih zet inkhel a khaihlak hnuah unseeded Finn Emil Ruusuvuori laka 6-3 6-1 hnehna nen nuamsain semi-final a lut a; kum 21 mi Sinner hian Miami-ah set a la hloh lo a, last four lamah nizan result tarlan hman loha world number one Carlos Alcaraz leh ninth seed Taylor Fritz chak zawk zawk a tum ang.
Sabalenka barakhaihtu Sorana
![](https://theaizawlpost.org/wp-content/uploads/2023/03/saBA.jpg)