Sabalenka vawi thum chak zawn tur dangchattu Rybakina
Inrinni zanah set hnihna hloh chungin Elena Rybakina chuan US Open women’s singles final-a a khingpui Aryna Sabalenka laka 6-4, 5-7, 6-2 hnehna changin a career-a a tum thumna atan Grand Slam title a hlawhchhuak a, WTA World No. 1 ranking a chhuhsak nu hliamah chingal a thlawr!
Tarlan tawh thin angin, semi-final a luh rual khan Kazakhstan chhuanvawr Rybakina hian chawlhkar 99 chhung zet No. 1 ni tawh Belarusian kuta No. 1 nihna chhuksa turin a mamawh point a thawkchhuak a, vawiina hmeichhe ranking thar tarchhuah atangin world number one nihna a chang a, chu mi lawm lawkna atan a hma chiah zan final-ah Flushing Meadows final hnuhnung pahniha chak ve ve Sabalenka vawi thum chak zawn tum a dangbet zui leh ta a ni.
Kartawp final match-ah khan two-time defending champion Sabalenka chuan unforced error tum 35 zet neiin, talbuai tha duh reng reng lo Russian-born Kazakh chuan awlsam angreng takin set thumna a la a, New York major tournament bika match 20 teh meuh chak zawn tling tawh Sabalenka tlawm ni a herchhuak ve ta nge nge a, New York title vawi thum la zawn thei Serena Williams leh Chris Evert-te hnung a zui zo ta lo a ni.
Tuntum tournament tan hmaa a kheimit a tihnat avangin Rybakina dinhmun a derthawng phawt a, mahse, harsatna tawk loin a inlan zui thei mai ni loin kumina Australian Open trophy a lo lak tawh leh 2022 Wimbledon hlawhtlinna a lo chan tawh belhchhah turin kum 27 mi hi US Open lalnu thar a rawn ni zui ta hial mai!
Arthur Ashe Stadium-a top two player inhmachhawn kha Grand Slam final bika anni pahnih tum thum intawnna niin, dingchang ta zawk Rybakina khan US dollar 5.5 million prize zet a pai haw a; runner-up kutah USD 2,800,000 a lut ve bawk.
Sabalenka vawi thum chak zawn tur dangchattu Rybakina
