SAFF inkhawmpui chhimtu MFA president
South Asian Football Federation (SAFF) inkhawmpui lian SAFF Extraordinary Congress chu karliamta Zirtawpni khan Sri Lanka khawpui Colombo-a Shangrila Hotel-ah nghah niin,, All India Football Federation (AIFF) aiawhin Mizoram Football Association president Lalnghinglova Hmar a tel.
He inkhawmpuiah hian Asia chhim-chhak ram pasarih – Bangladesh, Bhutan, India, Maldives, Nepal, Pakistan leh Sri Lanka aiawh palaite an tel a, tarlan tak angin, Tetea Hmar hian India ai a awh a ni.
Asian Football Confederation president Shaikh Salman bin Ebrahim Al Khalifa chuan he hun hi hmanpuiin, Asia ramin football-a hma a sawn dawn chuan ram zawng zawngin hma a sawn a tul tih a sawi a, SAFF inpumkhatna leh thawhona chu tha a tih thu sawiin, duhsakna a hlan nghal.
SAFF inkhawmpui hian an danpui thenkhat an tihdanglam bakah SAFF championship hrang hrang kalpui dan turte an rel.
Inkhawmpui zawh hnu hian MFA president leh AFC president hi a hranpaa inkawmin India ram, a bikin hmarchhakin football lama hma a sawn theihna tura rawtna a neihte Mizo official lawk hian a sawipui a, Indian football hre chiang tura India a tlawh leh hunah football tuichilhna hmar chhak state tlawh tel turin a sawm nghal bawk.
Lalnghinglova Hmar hi Asian Football Confederation hnuaia Social Responsibility Committee member a nih mek bakah AIFF executive committee member a ni bawk.
SAFF inkhawmpui chhimtu MFA president
