Sai pui kal lai Sabalenka…
Melbourne khawpuia 2025 Australian Open khelh mek ni rukna nimin khan hmeichhe singles defending champion Aryna Sabalenka chu set hmasa zawkah han talbuai deuh laih hman mah se a tumpui Clara Tauson laka 7-6(5), 6-4 hnehna nen fourth round a lut zui leh ta tho a, he thu buatsaih laia result tarlan hman loh Poland nula Magdalena Frech leh 14th seed Mirra Andreeva inkhela chak zawk zawk lakah fiahna dang a hmachhawn zui leh ang.
Rod Laver Arena inkhel hmasabera hnehna a sualchhuah hnuah Belarusian chuan a tumpuiin beisei phak baka a khelh that thu sawiin, chuti chunga hlauhawm a vaikiang thei leh fourth round a lut chu a hlim em em tih a sawi.
Ni sa vawl vawl leh thli thaw tel bawk avangin player pahnih tan game harsa tak a ni a, chu mi chungchang chu Sabalenka hian sawiin, “Serve a hautak zual a, ball a rit lulh bawk,” a ti.
World number 42 Tauson lakah big-hitting Belarusian world number one meuh pawhin a tennis game tha ber a phawrh fuh hlei thei lo a, mahse, Martina Hingis (1997-99) hnu lama Melbourne Park-a title vawithum la zawn thei hmeichhe player hmasaber nih a tum mekna kawngah hma zawng a la sawn kal zel e!
Kumin hian a champion leh thei a nih chuan Sabalenka hi Australian Open women’s singles title vawithum la zawn thei pasarihna a ni dawn a, tarlan tawh thin angin, Swiss Hingis hnu lama a hmasaber a ni nghal ang.
Inkhel dangah 27th seed Anastasia Pavlyuchenkova chuan German veteran Laura Siegemund lakah 6-1, 6-2 hnehna nuamsa a hlawhchhuak thung.
Sai pui kal lai Sabalenka..
