Sairang kawng chhia siam
rang turin pawl pali-in ngen
Pawl pali – Mizoram Transformation Movement (MTM), Centre for Environment and Social Justice (CESJ), Mizoram First (MF) leh the Citizens Alliance for Truth and Social Justice (CATAJ) chuan Ningani khan National Highways & Infrastructure Development Corporation Limited (NHIDCL) executive director Virendra Kumar Jakhar an kawm.
NHIDCL hian Mizorama national highway km 921 a enkawl mek a. An hotupa an kawmnaah hian Sairang to Kawnpui kawng chhe lutuk avanga lirthei tlu thin leh kawng tha lo avanga Mizorama nitin khawsak a buai phah zia an sawi a. Hemi chungchangah hian thu chiang zawk leh hnathawh an tum dan zawtfiahin, tha leh rang takin, lirthei kal harsatna a awm lohnan hma la turin ngenna leh hriattirna an pe a ni.
NHIDCL executive director chuan kawng chhia siam turin hma an la mek a, theihtawp chhuah an tum tih a sawi. Fur ruahtui tlak chhung hi chuan black topping an ti thei rih dawn lo tih a sawi a ni.
Mizoram PWD hnen atangin Khamrang leh Kawnpui inkar leh Bilkhawthlir leh Kolasib inkar hi an enkawl tura la mai tur an nih laiin an la la chiah loa, lak thuai erawh an tum tih a sawi.
Kawng siam kawnga harsatna an tawh zingah, kum rei tak chhung forest clearance an nei loa, tunah chuan an nei tawh. Chutihrualin thing ding ho hi Forest department-in an kih leh senghawi tur a nih avangin tun thlengin hna tak tak an la thawk thei lo tih a sawi bawk.
Sairang kawng chhia siamrang turin pawl pali-in ngen
