National Highway No 54/6 – Sairang to Kolasib kawng thawmthat mek chu Kolasib bialtu MLA, deputy speaker Lalfamkima chuan Zirtawpni khan a tlawh a. NHIDCL hotute leh contractor-te chu chak zawka hna thawk turin a chah.
Deputy Speaker hian Sairanga Forest IB atanga kawng thalo lai enfiahin, NHIDCL-a an executive engineer leh contractor te chu an hmanraw hman leh an harsatna tawh a zawt. Ruahtui leh kawng min thin chu an harsatna ber niin an sawi a, duh anga lung quality tha hmuh mai tur a awm lo chuan an hnathawh tamtak a daih rei theih loh phah niin an sawi.
An harsatna tawh chu thil awm tak pawh ni mah se, Mizoram chak lak na ber, kawng pawimawh tak a nih avangin mipui mamawhna hriaa theihtawpa tan la zual turin deputy speaker hian a hrilh a ni.
Kawng siam mek hi tunhnai ruahsur leh leiminin kawng a tichhe hle a. Contractor-te sawi danin, phai atanga lung tha chi leh hmanraw dang chahin, theih ang angin an buaipui a, hmun thenkhat paver block-a siam a ni bawk. Rel kawng siam mekah approach road an laih atanga tuihawk luang thin chuan harsatna a siam nia an sawi chu ruahmanna tha zawk awm theih dan sawi ho nghal a ni.
Kawng chhe zual lai hi dry lean concrete (DLC) leh pavement quality concrete (PQR) tea thawkin, kawng siamtute zinga pakhat, Goyal Infrastructure chuan hmanraw tha zawk state pawn atangin leh rel kawng siamtute hnen atangin an chawlut thin tih a sawi.
Deputy speaker hi Kolasib district bawrhsap Robert C Lalhmangaiha, SP bakah PWD senior EE ten an tawiawm a ni.
Sairang – Kolasib kawng siam enpui
