Sairang leh Silchar inkarah rel service
Union Railway minister Ashwini Vaishnaw chuan Thawhtanni khan Sairang leh Silchar inkar rel service thar vailiamin leh Guwahati Rel Station-a Blended Hospitality Service a hawng a. Sairang Rel Station-ah hemi puala inkhawm buatsaih chu chief minister Lalduhoma’n a telpui.
Sairang to Silchar rel service tur hi No. 05679 niin, kar khatah vawi 5 a kal thin dawn a ni.
Chief minister chuan, Prime minister Narendra Modi kaihhruaia Act East hmalakna azarah Mizoram leh hmarchhak bial chu ram hmasawnna lana hmun pawimawhah a chang chho a. Hmun kilkhawr zawka ngaih thinte chuan inkalpawhna tha zawk kan nei mek tih a sawi.
“Sairang leh Silchar rel service hi chu’ng zinga pakhat chu a ni a. He rel service thar hian Assam nena kan inpawhna a ti tha lehzual anga, sawhthing leh thlai dang kan tharchhuah hralhna tur zau zawk min hawnsak anga, kan flagship scheme Bana Kaih a ti chak dawn a ni,” a ti.
Sairang leh Silchar inkar rel tlantir tura a dilna a tihhlawhtlinsak avangin Union Railway minister chungah lawmthu a sawi tih Lalduhoma hian a sawi a. Silchar chu kan thenawm khawpui pakhat a ni satliah loa, economic lama kan kawngpui pawimawh a nih avangin he rel service hi kan economy-in a thatpui dawn tih a sawi a ni.
“Thla 5 liamta mai khan Sairang Rel Station hi hawn a ni a, hawn a nih atanga hun reilote chhungin a tihchangtlunna hna tam tak thawh a ni leh tawh a. Railways hmalakna hian fak a phu a ni,” a ti.
Hemi hnu hian chief minister hian a ngenna anga Sairang Rel Station, world class rel station-a siam tura tih fel tak design a en a. Railways thawktute hian hnathawhna tur cheng vaibelchhe 97 sanction a ni tawh tih sawiin, tender an tichhuak tawh a, tender hi thla thar March tir lama hawn an tum tih an hrilh.
Sairang leh Silchar inkarah rel service
