Sairang to Vairengte kawngpui siamthat mek chu an zo hnai a, contractor hnufual ik J. Infratech Limited chu thawktu tam zawk lak velh tura tih an ni. Contractor-te hian an kawng siam endiktu an tam lutuk leh, hotu lu lamin lo dawnsawn a ngai zel si chuan an hna in a tawrh phah niin an sawi.Central YMA Road Monitoring Committee chuan Sairang to Vairengte national highway siam mek hi Thawhtanni khan an endik a. Sairang Zero Point atanga Buichali lei inkar, New Khamrang to Kawnpui leh Kolasib to Bilkhawthlir kawng siamtu J. Infratech Ltd hi, an hnathawh dan thlirpuiin zawh hun tura an intiam – 2026 April 30-a hna zawng zawng an thawh zawh vek hman loh an hlau tih CYMA hruaitute hian an hrilh a. Hnathawh quality chhiat phah hauh loa, a chak thei ang bera thawk chhunzawm tur leh, hnathawktu pawh a tam thei ang ber lak belh turin an hrilh.
CYMA Road Monitoring Committee hian Kolasib leh Rengtekawn inkar kawng siam an en lai hian, alkatra (bitumen concrete mix) kawngpuia an chap darh tawh, road roller-in a la chilmuk loh chu chik zawkin an endik a. A sat zawng (temperature) chu pawm theih chin aia a hniam tawh avangin paih vek turin an hrilh. CYMA hruaitute awm lai hian excavator hmanga hai khawkin an paih leh nghal vek tih sawi a ni.
Buichali lei to New Khamrang inkar thawktu BRC Company chuan March chhung hian thawh zawh vek an tum tih an lo sawi a. CYMA hruaitute pawhin hnathawh dan an enpui atangin, tun thla chhunga an zawh hman an rinpui. Kawnpui to Kolasib leh Bilkhawthlir to Vairengte inkar siamtu Balaji Constructions Company chuan hna an zo thawkhat tawh tih sawi a ni.
Contractor-te hian an harsatna tawh leh, puih an ngaihna an lo thlen a. Duh anga hna an thawh chak tawk theih loh chhan an sawi pakhat, kawng siam endiktu an tam lutuk leh endiktu hrang hrang an rawn kal apianga contractor (company) lama a hmuna thutchiltu zingah, a hotu lu berten tawiawm zel a ngaih thin avangin an nitin hnathawhin a tawrh phah tih an sawi a. Central YMA hruaitute hian an hriatthiampui tih sawiin, a theih chuan kawng endiktu dangten, an remchan huna kal tawp lo deuhin, NHIDCL leh contractor-te remchan hun zawt hmasaa programme siam theih nise an duhpui tih an sawi.
Endiktu hrang hrangin hnathawh hmasak tur chungchangah duh dan hrang an neih thin avanga contractor-ten harsatna an tawh thu an sawi pawh an hriatthiampui tih sawiin, a theih chin chinah NHIDCL leh contractor-ten ruahmanna an siam lawk anga hna thawhtir theih nise an duh tih an sawi bawk.
CYMA Road Monitoring Committee hian kumin January 10 khan Sairang to Vairengte kawng siam hna an endik tawh bakah Sihphir to Kawnpui kawng BRTF-in a siam mek chu January 15 leh 23 khan an lo endik tawh a ni.
Sairang-Vairengte kawng siam zo hnai Kawng endiktu tam lutuk manganpui
