Kolasib district-a eizawnna atana lirthei hmangtu pawl ho chuan Sairang leh Vairengte inkar kawng chhia siamtha turin sawrkar an phut a, October 19 thlenga siamthat a nih loh chuan tiam chin awm loa kawng dan an tum tih an sawi.
Mizoram Tipper Association (Driver’s & Owner’s) District Hqrs Kolasib leh Kolasib District Driver’s & Owner’s Joint Action Committee thuchhuak chuan Mizoram chak lakna ber, Vairengte to Sairang leh Bairabi to Kolasib kawngpui chu lirthei tana zawh hlauhawn leh chhiatna nasa zawk thleng thei dinhmunah awm tih sawiin, tunah pawh lirthei khalhtuten harsatna namen lo an tawk mek tih a sawi. Hei vang hian kawng siam hna thawktuten chak taka hna an thawh theihnana hma lakpui turin Kolasib district bawrhsap hnenah ziakin ngenna lehkha an thehlut.
October 19 thlenga kawng chhia siamtha tura hmalakna a awm lo a nih chuan Vairengte to Sairang leh Bairabi to Kolasib kawng chu chak zawka hna thawh a nih theihna atan an driver puite leh lirtheia eizawngte hnenah tiamchin awm loa heng kawngpui hi tumahin zawh lo turin hma lak an tum tih an sawi a ni.
Thudawn danin, Sairang leh Khamrang inkar kawng chu a la chhe hle a, lirthei lian tlan ho pawh tun thlengin a inchhawka tlantir a la ngai. Mizoram Truck Drivers’ Association pawhin kawng chhia kaihhnawihah hian hmalak dan tur rela thutkhawm an tih sawi a ni.
Sairang-Vairengte kawng siamthat phutin Oct. 19 thleng nghak dawn
