National Bamboo Missions Fund nuai 252.826 sengin Sairang Horticulture Centre-ah mau sawngbawlna tur din a ni a. Nilaini khan chief minister Lalduhoma’n hawngin, mau chu kan economy tithatu a ni thei tih a sawi.
He hmunah hian kum rei zawk mau dahthat theihna, nget thei lo tura sawngbawlna – treatment & seasoning plant a awm a. Mau hmanga meihawl leh vinegar siamna tur – Activated Carbon Product Unit leh, heng mau sawngbawl sa dahna leh a sawngbawl tur dahkhawmna – depot leh godown a awm bawk.
Chief minister chuan mau hi kan ramin resource kan neih that, a chhawr pawh kan chhawr tangkai a ni, tiin, “Tunlai mila kan hman thiam zel hian kan economy tithatu, eizawnna tam tak min siamsaktu a ni thei a. A treatment plant atanga sawngbawl tawh hi kum 50 thleng hman theih tura ngaih a ni. Mau hmanga thil siam thinte tan a hlu hle ang,” a ti.
Meihawl kan siamna ber chu thing a ni a, thing puitlin hun chhung a rei a, mau erawh kum hnih khat lekah an lian leh mai a, a zung nena kar a nih loh phei chuan an thi hleithei lo tih a sawi a. Meihawl siamna atana mau hman hian ramngaw chereu chak lutuk tur an veng dawn tih a sawi a ni.
“Sawrkar enkawl factory leh plant hi an dam chhuak tha lo thin hle a. Kan unit hawn pawh hi department-in an enkawl phawt dawn a nih hmel a. Tha takin enkawl ula, tangkai takin hna thawk se kan duh a ni,” chief minister hian a ti.
State Bamboo Mission, Horticulture department hotute sawi danin, a species azirin mau hi an tlakna leh an bawh a inang loa. Mau (mautak/ rua) hi thlai dang anga kumtin chi chhuah an ni loa, kum 30-50 danah a tlangpuiin chi an chhuah thin. Hei vang hian chin pun leh awmze nei zawka thei/ thlai kung dang anga phun a tul, tiin, a ching tur hi Zau (cluster) pathum – Chhingchhip, Baktawng leh Saiphal (Mamit district) khuaah din an ni tawh tih an sawi.
8 Bamboo treatment and seasoning plant hi cheng nuai 10 man a ni a. A project-ah hian a khawl man chauh niloin a in (housing) sakna leh chemical man zawng zawng a tel. Chemical-ah hian mihring tana hlauhawm lo turin Copper Azole hi pawlh dal hman a ni dawn.
8 Activated Carbon Product Unit hi nuai 192.826 a siam a ni. A project-ah hian a building sakna a tel nghal. Ni khatah meihawl ton 3 a siam theih a, kum khatah ton 900 siam thei tura beisei a ni. Nitin mau pum 670 vel a mamawh a, meihawl a siam rualin nitin vinegar litre 100 vel a siam chhuak ang. Hman tlaka distilled hnuah phei chuan nitin vinegar fir tha litre 54 vel a chhuak thei dawn a ni.
8 Bamboo depot and godown hi cheng nuai 50 man a ni a. He project bik hi mau treat tur dahkhawmna leh treat sa dah na atante, mau atanga helai hmuna siam hrang hrang siamchhuah dahna atan tih a ni. An centre-ah bik hian bamboo chipping tihnan leh chip sa dahnana hman a ni.
8 Heng ho hi National Bamboo Mission 2018- 2019 suma din leh ruahman a ni. Mau sawngbawlna din kawngah hian North East Cane & Bamboo Development Council-in technical support a pe a, a enkawl dan training pawh a pe dawn.
Sairangah mau sawngbawlna din Mau hi kan economy tithatu tur. – Chief minister
