Saitual leh Kolasib
ah Y20 Meet hmang
Mizo Zirlai Pawl leh Mizoram Sports & Youth Services department tangdun buatsaih ‘Y20 Meet on Patriotism, Nationalism & Development’ chu Ningani khan Govt Saitual College-ah hman a ni a. Zirtawpni khan Govt. Kolasib College ah hman a ni bawk.
Kolasiba hmanpuitu minister K Lalrinliana chuan hmasawnna hna thawk ho tura ram 20 intelkhawm, G20 chuan ram ti hmasawn turin mahni hnama chian a, hnam hmangaihna leh hnam tana inpekna thinlung thalaite ah ngaihhlut tharna siam an ngaipawi mawh tih a sawi a. Ram humhalh tur chuan hnam ziarang chawisan leh lam vawnnun leh mahni hnam zahpui loh a pawimawh tih a sawi. Hnam humhalhna’n kawppui zawn kawngah fimkhur a tul, tiin, Mizo mipate chu pasal tlak ni tura nun uluk a, innghahna tlak ni tura eizawnna kawnga taimak chhuah leh hnamdangte tan pawha entawntlak ni tura invawn thianghlim kawngah tan la turin a fuih.
Saituala hmanpuitu Human Resource Development vice chairman Dr L Thangmawia, MLA chuan harsatna in Zohnahthlakte min hnukkhawm thin, tia sawiin, “Tunhmaa Lusei tawng hmang lo Mizo lo riaua hmuh thinna tam tak a bo tawh. Tuna harsatna zawng zawng hi kan hnam indin chhoh hunah thawnthu ngaihnawm a la chang dawn a ni,” a ti. Langsar lo rawngbawlnaah kan kal nat phawt chuan hma kan sawn ang, tiin, “Hei hi kan intlansiakna tur a ni,” a ti a. Mi fak phut lo leh mi hmuh atan ni loa, kan ram leh hnam tana kan tih theih tawk thiltha kan tih suau suau chuan hma kan sawn dawn tih a sawi.
Saitual leh Kolasib ah Y20 Meet hmang
