Saitual town-a ram chhin- chhiahna peihfel

Saitual town-a ram chhin- chhiahna peihfel
Saitual Town huamchhunga khaw 6 survey zawh takah Nilaini khan Land Revenue & Settlement miniter B Lalchhanzova’n Record of Rights (RoR) a semchhuak.
Revenue department-ah thil thar leh tih dan thar an kalpui mek zel tih minister hian a sawi a. Mipui thlawpna an dawng tha chu lawmawm a tih thu a sawi. Department-a a thawhpuite mipui rawng an bawlnaah theihtawp an chhuah avangin lawmthu a hrilh a. An thahnemngaihna avangin SASCI Part VII-A hnuaiah ULPIN generation, mobile number & address seeding leh standardised RoR hman avanga incentive cheng vaibelchhe 29.57 an hmu thei chu a lawmawm tih a sawi.
RoR-ah hian ram chungchanga hriat ngai leh tul a awm vek a, hei hi a felfai zawk bakah a bo thu ah pawh LSC tihbo anga buai viauna tur a awm lo, tiin, Saitual district-a khua la survey loh khaw 28 pawh drone hmanga survey zawh tawh a ni a, tun atanga reilote ah property card 4423 semchhuah a ni dawn tih a sawi bawk.
Saitual Town resurvey hian village council area 6 huamin, ROR awm zat chu – Sihfaah 285, Keifang Venghlunah 476, Keifang Venglai 164, Keifang Leitan 364, Rulchawm 361, Ruallung 238, a vaiin 1879 a ni. Heng zinga 1670 hi peihfel niin, a dang 209 hi document fel loh avanga la pekchhuah theih loh a ni. RoR hi Revenue Branch DC office Saitualah a neituten an lak chhuah tura ruahman a ni.
Saitual Town resurvey hi Buannel Geo Solutions-in thawkin 2022 March 11-ah hna an tan a, 2023 April 25-ah report an thehlut. Buaipui ngai leh a hmuna enfiah leh ennawn ngaite department-in an ennawn hnuah, Caisias Research and Consulting-in RoR a hlawma siamna application an siam kaltlangin rang zawkin ROR hi peihfel a ni.