Hmun hrang hranga Zofate’n a hming an hria a, mi engemaw zat phei chu a hming han sawi hian an lung a leng ang; an sikul kal lai an hrechhuak ang. Pi Zadingi, sakei chekhlumtu, tiang chuan a chiang mai.
Pi Zadingi hian hun engemaw chen cancer natna a buan a, he natna vang hian July ni 19 chhun dar 12.25 khan kum 72 mi niin a boral. A boral thu hi hmun hrang hrangah a darh a, 1978 daih tawha sakei a chehhlum thu pawh a thang tha leh.
Buarpui khuaa cheng Pi Zadingi hian July ni 3, 1978-ah sakei a that a, a fa pahnihna tur a pai lai niin, a thingphurnaah sakei hi a that a ni.
Sakei hian Pi Zadingi thingphur a rawn bei a, chi-ai lova lo hmachhawnin, a hmanraw neih chhun hreipuiin a lo chek hlum a ni.
“Hlauh chu hlau ve tho e… Mahse hlauh theih pawh a ni lo. Ka inngaihtuah a, tlanchhe ta ila min um dawn tho tih kha ka hria a. Ka lo châng ve ta mai a ni,” Pi zadingi chuan a ti.
Fur lai a ni a, khua atanga km 1 pawh tling lovah thing hi a phur, a thingphurh tur a eh laiin sakei nen hian an intawng a ni.
Thawm a hria a, a tirah chuan sanghal a nih a ring. Thlang lam ngaw hmun a’n bih a, engmah a hmu lo. Chumi hnuah a tum lohna lamah, a hma zawnah tak sakei chu a rawn lang ta a; “Ram chingit karah a lu a rawn lang a,” tiin an intawn dan hi a sawi.
In atanga a chhuah hnu-ah a thiante pahnihin thingphur tura zui ve an tum tih a hria a, an rawn thleng tawh ang em tih te, auh tur em ni tih te a ngaihtuah. Tlan haw thuai thuai a tha zawk ang em tih te pawh a ngaihtuah. Mahse a theih ang anga lo hmachhawn mai chu fuhin a ring a, a hreipui hum tha sauh sauh chungin sakei hmaah chuan a ding ta a ni.
Sakei chuan a rawn zuan ta a, Pi Zadingi chuan a hmanraw neih chhun chuan a lo chek ta a ni. A chhipah tak a chek a, a chhip ding lam kak duai khawpin a lo chek. Sakei chu che tur a awm ta lo.
Sa tuanrang tih takah sakei chuan Pi Zadingi kutzungchal vei lam a lo ham hman hram a, a thi a reh theih loh avangin khuaah hmanhmawh taka tlan hawin, an khaw damdawi in a pan ding nghal. Damdawi te an lo hnawih a, damdawi ina thawk pa pahnihin fei leh silai kengin sakei awmna lam an pan nghal ve thung. YMA hnatlan ni a lo ni hlauh a, ram lam panin YMA member-te an chhuak nghal bawk. Hmeichhiain sakei a cheh hlum thu chu a thang zui ta a ni.
He sakei hi sum 5 vel lai mai a lo ni a, ramriakte’n sakei thawm an hriat thin lai niin, khaw lam hi a pan nia ngaih a ni.
A pasal ngei pawhin a tirah chuan a awih lo a, a nupuiin sakei a cheh hlum a ring thei lo! Mi pawhin mak an ti a, zirlaibu-ah Pi Zadingi sakei cheh hlum thu chu zirlaite’n an zir ta hial. Pi Zadingi hming chu ram pumah a thang a, Buarpuia zinte chuan amah hmuh ngei an la tum thin.
“Mak ka ti a. Hetiang tak hian miin an lo ngaihlu ang tih ka ngaihtuah lo. Zirlaiah a tel ang tih te chu ka ngaihtuah pha lo reng reng,” Pi Zadingi chuan a ti a, “Rin phak bakin a lar ta a. Tun thlengin mi hian min la kawm phah a,” a ti bawk. An khuaa Hindi zirtirtu C Darlianthanga’n chipchiar taka a ziah chu a sakei thah thu tilartu nia a hriat thu a sawi.
Pi Zadingi hian huaisen lawmman Shaurya Chakra a dawng a, thla tin pawisa fai a dawng thin.
Pi Zadingi ruang hi tlaivarpui a ni a, Inrinni hian Buarpui-a an chenna inah thlah liam a ni ang.
Sakei chekhlumtu Pi Zadingi a chawl ta
