Salah kutah a vawi thumna atan
PFA Player of the Year award lut leh!
Premier League Player of the Season award leh goal thun tam ber chawimawina Golden Boot baka assist ngah ber lawmman Playmaker award hnuhnungber kawltu ni mek Liverpool forward Mohamed Salah chu England rama an professional footballer rual intelkhawmna Professional Footballers’ Association (PFA) chuan PFA Player of the Year atan an thlang leh tawh!
He ti hian Egyptian hi season khat chhunga award pathum hui vek thei player hmasaber a ni ta.
Kum 2017-a Anfield vak thleng Salah hian goal 29 leh assist tum 18 nei chungin season liamta khan Premier League top scorer nihna a hauh a; Liverpool-in league title an lakna kawngah thawhhlawkin, runners-up Arsenal nena an inthlauhna pawh point 10 ngawt a ni.
Tarlan tak angin, kum 33 mi hian Premier League Player of the Season award a kawl mek bakah Golden Boot leh Playmaker award dawng bawkin, Liverpool-a a season khatna a hman zawh chiah khan a vawikhatna atan kum 2018-ah PFA award a lo dawng tawh a; kum 2022-ah dawng lehin, kumin hi a vawi thumna a ni ta.
PFA Player of the Year award dawng thei tur hian mi paruk chhawpchhuah niin, he mite atang hian Premier League leh Football League team belhkhawm 92-a PFA member-te’n vote hmangin an duh ber an thlangchhuak ta a ni.
He shortlist-ah hian Salah Liverpool team-mate Alexis Mac Allister bakah Newcastle United-a nghet lo Alexander Isak, Manchester United star Bruno Fernandes, Arsenal player Declan Rice leh Chelsea thuam inbel Cole Palmer-te an ni.
Salah hian kumin April thla mai khan Liverpool-a a contract neih lai chu kum hnih atan a pawtsei a, Saudi Pro League lama kal mai tur anga sawirik pawh a reh chhunzawm ta a ni.
Young Player of the Year
Aston Villa leh England midfielder Morgan Rogers chu Young Player of the Year atan thlan niin, kum 23 mi hian season liamta khan match 37 a start atangin league goal riat a khung tling a; Celtic laka a hat-trick siam telin Champions League goal li a thun tling bawk.
Women’s Player of the Year
Arsenal midfielder Mariona Caldentey kutah Women’s Player of the Year award a lut ve thung.
He Spaniard nula hian season liamta khan London club-a a season khatnaah league goal kua khung tlingin, a club hlui Barcelona hneha Arsenal-in Champions League trophy an hawnna kawngah goal riat zet a thawh tling bawk.
Hmeichhe Young Player of the Year award dawngtu ve thung chu Canadian forward kum 21-a upa Olivia Smith niin, season liamta inelna hrang hrangah goal kua khung tling chungin Liverpool leading scorer a ni a, Young Player of the Year award a hui ta a ni.
Smith manah Arsenal hian one million pound (USD 1.35 million) an seng niin media lamin an tarlang a, a tak a nih chuan hmeichhe player zinga digit sarih (seven-figure) bang thiat thei hmasaber a ni.
Premier Leagu
Team of the Year:
Goalkeeper:
Matz Sels (Nottingham Forest)
Defenders:
William Saliba (Arsenal)
Gabriel (Arsenal)
Virgil van Dijk (Liverpool)
Milos Kerkez (Bournemouth, now Liverpool)
Midfielders:
Alexis Mac Allister (Liverpool)
Ryan Gravenberch (Liverpool)
Declan Rice (Arsenal)
Forwards:
Mohamed Salah (Liverpool)
Alexander Isak (Newcastle)
Chris Wood (Nottingham Forest)
Women’s Super League (WSL)
Team of the Year:
Goalkeeper:
Phallon Tullis-Joyce (Manchester United)
Defenders:
Emily Fox (Arsenal)
Maya Le Tissier (Manchester United)
Millie Bright (Chelsea)
Jayde Riviere (Manchester United)
Midfielders:
Yui Hasegawa (Manchester City)
Erin Cuthbert (Chelsea)
Kim Little (Arsenal)
Forwards:
Mariona Caldentey (Arsenal)
Alessia Russo (Arsenal)
Mary Fowler (Manchester City)