Salah kutah Premier League player of season award

Salah kutah Premier League player of season award
Kum 2017-a AS Roma atanga Liverpool zawm ta Egypt striker Mohamed Salah chu Premier League player of the season atan thlan a ni a, tun hi kum 32 mi kuta he award a luh vawihnihna a ni.
Egyptian hian 2017-18 campaign zawh rual khan he chawimawina hi a lo dawng tawh a, tun season-ah Reds chu Premier League title lakpuiin Premier League mimal chawimawina hlu bik a dawng zui leh ta a ni.
He award dawng tur hian a team-mate pahnih Virgil van Dijk leh young player of the season atana an thlan zui tak Ryan Gravenberch-te’n an nawr na ve hle chungin a buk a rit ta ber a ni.
Dutchman kum 23 mi Gravenberch kha tun season-a Premier League midfielder-te zingah a chugnung larh a, interception ngawt pawh vawi 59 neiin, Liverpool player-te zinga ball inchuha hlawhtlinna rate nei sang ber a ni bawk.
Chawimawina ropui ber Premier League player of the season atana nominee (shortlist) dangte chu – Arsenal mi Declan Rice, Newcastle star Alexander Isak, Brentford thiampuipa Bryan Mbeumo leh Nottingham Forest tana player pawimawh pahnih Morgan Gibbs-White leh Chris Wood-te an ni.
Kumin hi 2018-19 season hnu lama Manchester City player-te’n he award an dawn zawh loh vawikhatna a ni!
Liam Delap (Ipswich), Anthony Elanga (Nottingham Forest), Dean Huijsen (Bournemouth), Cole Palmer (Chelsea), Joao Pedro (Brighton), Morgan Rogers (Aston Villa) leh William Saliba (Arsenal)-te chu young player shortlist zinga tel, award dawng pha ta lote an ni.
Pathianni season final game-a Crystal Palace an sut hma thleng khan Salah hian league goal 28 thun tlingin, assist ngawt pawh tum 18 a ngah a, record siama assist vawi 20 nei tling pahnih Thierry Henry leh Kevin de Bruyne a hnaih chho thuak.
Egyptian hian tun season-ah Premier League history thar siamin, tuipui ral player-te zinga goal 184 thun tling awmchhun Sergio Aguero record a khum ta hial a; kum 2027 thleng Anfield-a cham zui turin kum hnih dang atan contract thar a ziak ta bawk.
Tunthla vekah hian a tum thumna atan Salah hi Football Writers’ Association footballer of the year atan thlan a ni a, vote 90% chuang a hmu nghe nghe!