Uchang lam chhungkaw zing ami, Salamander chi thar, khawvelin a la hriat loh chu India hmarchhakah hmuhchhuah a ni.
Salamander hi uchang leh chhawknghawlte nen ‘animal class’ inang, Amphibian an ni a. Laiking/laitel lam ang deuh mah se, reptile an ni lo. Amphibia class hnuaiah hian order thum – Anura: Uchang leh Utawk (7632 sp.), Caudata: Salamander (822 sp.) leh Gymnophiona: Chhawknghawl (221 sp.) an awm. Caudata hi khawvel hmarlam, hmun vawt lam bawhin khawvel huapah Caudata zinga genus Tylotitriton hnuaiah hian salamander species 39 hmuhchhuah tawh a ni a. India ramah chuan kum 2015-a Nepal atanga hmuhchhuah ‘Tylotitriton himalayanus’ (Bhutan, Darjeeling leh Nepal ah an awm) chiah hriatchian a la ni.
Hetihlai hian India hmarchhak state thenkhat – Arunachal Pradesh, Manipur, Nagaland leh W. Bengal ah te salamander la hriatchian loh a awm tih hriat a ni a. He salamander hi tlangsanga ngawpui tha tak kara dil leh tui awmnaah hmuh thin a ni. An khawsakna hi hmun biru leh hel pawl chet tamna hmun a nih avangin zirchianna a la awm hleithei lo a ni.
Kum 2022 khan Mizoram University Zoology department, Developmental Biology & Herpetology laboratory-a Prof HT Lalremsanga leh a thuihruai researcher hote chuan Manipur-a tlangsang tak leh ngawkara awm dil, ‘Zaimeng lake’ leh hmun hrang hrangah expedition neiin heng salamander hi an pianhmang leh DNA chi hrang hrang an zirchiang a. Zirchianna atang hian species thar an ni tih hmuhchhuah niin, a hmingah helai dil hming chawiin ‘Tylototriton Zaimeng’ tih an phuah a ni.
Heti hian khawvel pumah Tylototriton salamander hi species 40 an awm ta a, India ramah chuan tuna salamander hmuhchhuah T. zaimeng leh T. himalayanus an awm ta tihna a ni.
Salamander thar hmuchhuak
