Thla 14 vel an inneih hnuah Sam Asghari chuan Britney Spears nena inthen dilna court-ah a thehlut a, court document a a landan chuan Sam Asghari hian July ni 28, 2023 atangin an awm hrang tawh niin a tarlang a, inthen a duhna chhanah chuan ngaihdan leh duhdan inan lohna an nei niin a tarlang bawk. Sam Asghari hian an inthen hnuah pawh Britney Spears atangin a pasal hlui a nih anga chhawmdawlna dawn a phut bakah a ukil rawihna te pawh pek sak turin a phut nghal a, chutihrualin an inthen hnuah ro insem dan tur chu la rel chawp atan a dah tel bawk.
Britney Spears, kum 41, leh Sam Asghari, kum 29, te hi 2016 a Britney Spears music video ‘Slumber Party’ an siamna atanga intawng an ni a, he music video an siam hnu lawk atangin an inzui nghal a, Britney Spears leh a pa court-a an inkhin rap rap lai, Britney-i’n a engkim mai a pa thuneihna hnuaia court-in a lo dah tawhna lak atanga tal chhuah a tumlai pawh khan Sam Asghari hi Britney kiangah awmin, kum 13 zet conservatorship hnuaia a awmna chu court-in a tihtawp hnu lawk, 2021 kum tawp khan an inhual zui a, June 2022-ah an innei ta a ni.
Sam Asghari leh Britney Spears te hian an inneih hmain an lo inthen leh palh a nih pawha sum leh pai thila an buai loh nan inremna, prenuptial agreement an ziak lawk niin report a awm a, he pre-nup-ah hian Britney chan a tha zawk a, report pakhatah chuan an inneih hmaa Britney sum lakluh zawng zawng chu an inthen leh a nih pawhin chuhbuai theih a ni dawn lo. Hetianga pre-nup an neih laiin Sam Asghari hian an pre-nup an diak diaka kal a duh dawn lo niin report a awm a, Britney hi a inphal zau deuh a nih loh chuan Britney chanchin tuihnai vak lo te pawh mipui hriat tura puanchhuahah a vau niin report a awm bawk.
Sam Asghari-a’n Britney nena in\hen dilna thehlut
