Samagra Shiksha-a thawkte
hlawh pe turin sawrkar phut
Mizoram sawrkara Samagra Shiksha hnuaia thawk zirtirtu leh thawktu dang mi 3487 chuan thla thum dawn hlawh an la thei tawh loa, an hlawh tur sawrkar laipui atanga thleng vek tawh hrenbeh sak chu a rang thei ang bera pechhuak turin Mizoram sawrkar an phut tih MNF party chuan an sawi.
MNF Gen. Hqrs. thuchhuak chuan, hun kal tawha kal dan thlirin, Samagra Siksha hnuaia thawktute tana sum lokal hi May 2024 vela 2nd instalment lo thleng tawh tura beisei a nih laiin, November 8-ah central atangin a lo thleng chauh a, a lo thlen tlai tawh tehlul nen, ni 15 bak Mizoram sawrkar chu kawl tang lo tura tih a nih laiin, November 23-a ni 15 a ral hnu vawiin thlengin pek chhuah a la ni lo tih sawiin, hei hian sum enkawl kawngah leh zirna ngaihpawimawh kawngah ZPM kaihhruai sawrkar hlawhchham zia a tilang tih a sawi a ni.
Zirna ngaihthah leh thawktute hlamchhiah sawrkar kan nei tiin, ‘An tha leh thiamna chhawr duh reng chunga an hlawh hrensak rengtu, Mizoram sawrkar hnuaia sum enkawltu Finance minister hian a hna a tlin thlawt lo ni ah kan ngai a. School Education minister pawhin a enkawl department thawktute pawimawhna a hre tawk lo nge, a ngaihna a hre thlawt lo tih hi mipui zawhna a ni,’ a ti.
Opposition an nih laia inti hria leh sawrkar lai na tak taka sel thintu, vawiina a tithei dinhmuna ding ta ten an mawhphurhna a rang thei ang bera hlen turin an phut tih MNF hian a sawi a ni.
Samagra Shiksha-a thawkte hlawh pe turin sawrkar phut
