Samsung Electronics chaun 90% chuanga an quarterly operating profit a tlakhniam avangin memory chip production chu an tihtlem tur thu a puang a.
Khawvela chip siamtu lian ber te hian global economy tlahniam leh pandmic len hnua demand hniam zelah an chip te an hralh chhe hle a ni.
Samsung chuan January-March inkar chhung khan an operating profit chu 600 billion won ($455 million) ah a tla thla tiin an sawi a, chu chu a hma kuma 14 trillion won an lakluh nen chuan beitham tak a ni. Chip production an titlem dawn tia an sawi hnu hian Samsung firm share chu 4% in a sang nghal thung a.
“Nasa takin memory chip kan siam chhuah kan titlem a ni” tiin South Korean tech giant te chuan an tarlang.
Covid avanga lockdown kalpui nasat a niha consumer tena ina hman tur electronics lam an lei nasat lai khan memory chips demand a sang hle a.
Kha vang khan chip siamchhuah lam chu nasa taka tihpun niin tunah erawh thil a pangngai leh tawh a, semi conductor manufacturer tam tak te chuan an siamchhuah leh demand inmil tawh loh avangin harsatna an tawk mek a ni.
“Economy a tlakhnimin loh theih lohin heng demand te hi a tlahniam nghal thin a. Hei vang hian a siamtute chuan chips siam chhuak belh tawh lovin an neihsa te tihral dan an ngaihtuah zawk thin” tiin analyst Peter Hanbury, management consultancy Bain & Company chuan a sawi.
Khawvela telvision, tablets leh smartphone siamchhuak hnem ber Samsung te hian an elpuite ang lo takin memory chip siamchhuah tihtlem an duh lo hle tia sawi a ni a. Tuna chips siamchhuah tihtlem tur an ti pawh hi thil thleng ngai lo anga ngaih a ni a. A chhan ber pawh thla kalta lawk khan South Korea a mega semiconductor hub siam nan 300 trillion won investment an tihtur thu an puan vang a ni.
Hetih rual hian investor te chuan Samsung-in memory chips siamchhuah tihtlem a kalpui hi semiconductor industry lam market tha leh ta tih tarlanna tiin an sawi ve thung.
Samsung ten memory chip siam titlem
