Mizoramah hectare 24000 chu sangha dil siam theihna nia chhut a ni a, heng zinga hectare 4000 chuang velah chauh sangha dil siama vulh mek a ni.
Hei hi Mizoram Fisheries department chhut dan a ni a. Ram pum huap anga chhutin mi pakhatin kum khat chhungin sangha kg.11 – 13 inkar vel kan ei tlangpui a. Mizoramah chuan kum khat chhungin mi pakhat tan zel kg 6.4 chauh kan la thar chhuak a, a tam zawk chu state pawn atanga lakluh a la ni.
2023 March 28-a Fisheries department hotute nen an thutkhawm atanga tun thlenga he department hmalakna thlirlet pahin central schemes leh bank kaltlanga sangha dil siamtute tanpui dan tur chu Ningani khan Raj Bhavan-ah larsap Dr Hari Babu Kambhampati hoin department hotuten an sawikhawm a. Mizoram Rural Bank, State Bank of India Mizoram, leh Mizoram Cooperative Apex Bank hotute pawh sangha dil siamtute nena bank inthlunzawm leh thawhho a pawimawh zia sawipui tura sawm an nih angin an tel.
Larsap chuan sangha vulh bikah kan state-in intodelh theihna a nei sang hle tih a sawi a. State sum dinhmunin a zir loh avanga Fisheries department-in budget a nei lian thei lo tih sawiin, heti chung hian central sponsored scheme tam tak, sangha sil siamtute dawmkanna leh tihhmasawnna tur erawh a awm teuh tih a sawi a ni.
Mizoramin sangha thar chhuah tihpun, kan eikhawp thara hralh chhuak thei tur khawpa tam thar tur chuan Fisheries department-in nasa taka tan a lak a, sawrkar laipuiah project tam zawk a thehluh zung zung a ngai tih a sawi bawk.
Central schemes hnuai atangin sangha sil siamtuten subsidy an dawn thin belhchhah turin bank loan an mamawh belh tih a sawi a. Sangha dil siamtute zingah loan la duh lo an awm thin chu zirchian a tul, tiin, “Bank loan chungchang leh a rulh dan kalphung chiang taka an hriat loh vang a ni thei a, department leh bank lam pawh thawkhoin tan in lak a tul a ni,” a ti.
Fisheries secretary H Lalengmawia chuan tunhnaia an department hmalakna, hlawhtlinna, ministry-a rawtna thehluh zat, hmalak dan tur leh ruahmanna an neih mek a sawi a. Sawrkar hnuaia hmalakna hrang hrang chu powerpoint hmangin director Laltleipuii leh a thawhpui officer-ten an sawifiah bawk.
Presentation neih zawh hian banker-te nen sangha dil siamtute tana loan pek chhuah chungchang sawiho a ni.
Sangha dil siam theihna hectare 20000 vel hman tangkai la ni lo
