Sanghaa intodelh tura tan a ngai: Fisheries Minister
Fisheries minister K Lalrinliana chuan sanghaa intodelh tura tan a ngaih thu a sawi a, mi tin tana him leh chaw tha a nih avangin thar tam deuh deuh turin sangha dil mai ni lo, buh nena dah pawlh paddy-cum-fish culture-te pawh uar deuh deuh a pawimawh a ti.
Zirtawpni khan minister hian Khawzawl-ah District Fisheries Development Officer (DFDO) Office a hawng a, sanghaa intodelh tura tan a ngaih thu sawiin, sangha khawi chi mai bakah kan ram lui dunga awm sangha tui tak takte leh lui dung nungcha dangte khawi pun kawngah department-in tan a lak mek zel thu a sawi.
Thawktu indaih lohna leh hmanraw changtlung tawk lo chunga fisheries department hnuaia thawkte inpeknain rah tha a chhuah thin chu fakawm a ti a, ei leh bara intodelh thei tur leh kan ram thar chhuahte tam zawk hralh chhuah a nih theih nan tanlak nasat a ngaih thu sawiin, lui dung nungcha inthlahpung chak takte chu ei leh bara intodelh theihna tura awlsam leh rang thei ber turte zinga mi a ni a; tiduhdah leh suasam mai lovin a humhalhna lam kan buaipui a ngai a ni, a ti.
Lui dung nungchate humhalh kawnga khaw hrang hrangah harhtharna a thleng mek niin a sawi a, department leh YMA inkara thawhhona tha tak a awm chu lawmawm a tih thu a sawi. Kan zavaiin Fisheries Department thlawptu leh lui dung nungcha humhalhtute kan ni thei a ni, a ti.
Sanghaa intodelh tura \an a ngai: Fisheries Minister
![](https://theaizawlpost.org/wp-content/uploads/tap_logo-min-large.jpg)