Santos tana khel chhunzawm tur Neymar
Europe kawtkai chuangchhuak tura Barcelona a pan hmaa a club hlun Santos FC chuan Arab rama inhliam deuh reng an naupang hlui Neymar hi kumin January thla mai khan an hnenah hruaikirin thlaruk lek dam contract tawi an ziahpui a; a club hluiah chuan a chetha chho leh ta phian a, tunah kumin December thla thleng kawl turin Brazilian club chuan an naupang hlui contract hi an pawhseisak leh ta phawt a ni.
Brazil tana goal khung hnem ber ni mek Neymar hi tunah kum 33 mi ni tawhin, Saudi Pro League side Al-Hilal khan beiseina sang tak nen senglut mah se Arab ram kha damlohna’n a hmang a ni ta ber a, inhriatthiamtawnnaa an inthen hnuah a naupan lai atanga a club vawn tawh Santos chuan lawm takin an lo kuangkuah leh a, he hmun atang hian a chawrno thar leh mek a tih theih ang!
Santos tan hian belhkhawmin game 243-ah goal 141 thun tlingin, assist pawh tum 69 a nei tling tawh a ni.
Paris St-Germain leh Barcelona forward hlui hian Santos-a contract thar a ziah leh hma thleng khan Europe lama kirleh tura sawirik a ni hman a, mahse, Brazilian Serie A season tawp thlenga cham turin an inrem a, contract-ah hian pawl pahnihin an remtih dun chuan contract pawhsei theih a ni ang tih an bilh tel nghe nghe.
Europe-a kir loa Santos-a cham zui a thlan chungchangah Neymar hian a thinlung duhna ngaithla chunga thutlukna a siam thu sawi chungin, “Santos hi ka team a ni satliah mai lo a, ka home, ka zikchhuahna, ka tobul, ka history leh a ka nun a ni tawp mai.
“He hmunah hian naupang ni chungin ka seilian a, hmangaihna ka dawnna hmun niin, he hmunah ngei hian keimah hi ka keimah a, ka hlim takzet a ni.
“Ka lokir a, hmalam kan pan zel a, Santos FC-in a chim chin pangngai, a dinhmun ngai a luah chhoh lehna turin he hmunah hian ka cham rih dawn a ni,” a ti.
Santos-a a kirleh hnuah Neymar hian ngai a rawn awh chho leh kan tih ang khan thla 17 chhung zet a kalbo hnuin kumin March thla khan Brazil squad-ah a kirleh a, mahse, hliam tenau avangin World Cup qualifiers-a Colombia leh Argentina an hmachhawn tum khan a inlan lo thung.
Brazil tan game 128-ah goal 79 thun tling tawh mah se Uruguay nen October 2023-a an inkhelh tuma khup a tihnat hnu khan tun thlengin ram tan a la inkhel leh ta lo.
Santos FC club president Marcelo Teixeira chuan an star player an kawl zui leh tur chungchang sawiin, “Hei hi thil chhinchhiahtlak a ni a, Brazilian football tana ni lawmawm, Santos fans tana thilpek liau liau a ni.
“Kan idol, kan naupang, kan lalfapa rangkachak chuan kan number 10 shirt a ha zui zel dawn a, tun hi club siamthat chhohna kan kalpui mek atana hun pawimawh niin, chu mi atan chuan khelmual chhung leh pawn lam thlengin Neymar hi kan mamawh a ni,” a ti.
Santos tana khel chhunzawm tur Neymar
