Mizorama Sap missionary lut zinga chamhlen awmchhun chhungkua zinga a hnuhnung ber Violet Louise Anne Mark (85) chu November 13 zing dar 8.10 khan a chenna, Serkawr (Saikao), Siaha district-ah a thi.
Mizoram chhung, Mara chen tamna hmuna Sap missionary lut hmasa ber Rev. RA Lorrain thlah kalzel, Rev. AB Foxall leh Louise Marquerite Tlôsai Lorrain te fanu Serkawr khuaah 1938 April 16 khan a piang a; 1968 December 11 khan Mara tlangval Rev L Mark nen an innei a, Rev. Violet Louise Annie Mark tia dah zui a ni. A pasal bakah a fate 4 leh a tute a kalsan a ni.
“Pi Vaili” tia koh leh hriat hlawh zui ta Rev. Violet Louise Anne Mark ruang phum leh vui dan chungchangah Evangelical Church of Maraland puipate, Mara Autonomous District Council leh Siaha district-a tlawmngai pawlte bakah Saikao-a kohhran leh khawtlang, chhungkuate an inrawn hnu-in Pi Vaili ruang hi November 15 chhun dar 12.00 ah a chenna Saikao Villa-ah vui a ni anga, a ruang tlawh duh leh thil hlan duh tan Saikao pan theih a ni ang.
MADC chuan thuchhuah siamin Pi Vaili sunna atan ni thum chhung MADC office leh CEM bangla-ah India national flag a ngul chanvea zar a ni anga, a ruang vui ni hian MADC office leh a hnuaia zirna in zawng zawng khar a ni ang. Ni 7 chhung MADC area-ah intihlimna lam – sports leh thildang ti lo turin thuchhuah siam a ni.
Rev. RA Lorrain-te chhungkua hian Indopui II-na lai pawh khan Mara rama mission hna an kalpui mek hi chawl a, hawsan rih tura an tih pawh awih duh loin an cham zui a, kum 1977-a an mission a tawp hnu ah pawh haw loin an awmna hi an luah zui a, an chhungkua hian Siaha district-ah an lu an phum vek a ni.
Chier minister Zoramthanga pawhin Pi Vaili thihna hi a ui thu sawiin, kohhran mipui tan channa nasa tak a ni tih a sawi a ni.
Sap missionary hnuhnung thi
