Sap tawng thiam tuma zir leh hmang thinte kan nuih fo thin chu he tawng kan hlauh phahna nia a lan thu leh, hei hi paih bo a ngaih thu Assembly speaker Lalrinliana Sailo chuan a sawi.
Khawruhlian Higher Secondary School-in kumin HSSLC exam-a an zirlai zaa za an pass chu Zirtawpni khan an lawm a. He hun hmanpuitu, Chalfilh bialtu MLA ni bawk Lalrinliana Sailo chuan Mizote kan chak lohna awm thin chu Saptawng kan hlau te, thiam tuma zirte leh hmang thinte kan nuih fo mai hi kan chak lohna hnar a ni, tiin, Sap tawng hlauhna chu paih bo a, huaisen taka hmang turin zirlaite a fuih.
Social media hman thiam lohna chuan Zoram a run mek tih sawiin, “Aia upa zahna tiboin, NGO pawl zahawm tak takte, kohhran hlutnate a ti nep fo em aw tih theih a ni ta. Social media-a mite chhiatna ringawt hmu thin mi ni loin, social media hi finna leh thiamna zawnna atana kan hmang zawk tur a ni,” a ti.
Khawruhlian HSS hi kum 2010-a din a ni a, lumpsum status-ah a awm mek. Kumina MBSE-in HSSLC Exam result an tihchhuahah zirlai zawng zawng pass in, an din tirh atanga kumin inkarah HSSLC exam result 100% pass rate an neih tum sarihna a ni. Teaching staff pasarih awmin zirlai naupang 48 an awm mek.
Sap tawng hman hlauhna paih bo a ngai – Lalrinliana Sailo
![](https://theaizawlpost.org/wp-content/uploads/tap_logo-min-large.jpg)