Sapthei ching tura thlante
hnenah an mamawh hlan
Horticulture department-in Mission for Integrated Development of Horticulture Special Intervention hnuaia sapthei chin beihpui thlak mek chu Thawhlehni khan Chawngtlaiah Horticulture minister C Lalsawivunga’n a khuhhawng.
Hun engemaw ti chhung sapthei chingtuten ngaihsak an hlawh vak lo chung a, tlanchhe ve duh lo, sapthei ching chhungkua an la awm tih Horticulture minister hian a sawi a. Sapthei ching uar leh tura hma an lak chhan chu, India ram state dang aiin Mizoramah sapthei a tha duh bik niin an hria a, MIFCO nen thei leh thlai sawngbawlna an neih an tuai thar mek a. Tunah hian Chhingchhip Fruit Juice Concentration Plant-ah sapthei an her tan leh tawh tih a sawi a ni.
“Sawrkarin a market lamah tan a la a, sapthei chingtuten in thar chhuah ang hi chu a thlawnin a riral mai ring suh u,” a ti.
Sapthei chin programme hi district pali – Aizawl, Khawzawl, Serchhip leh Champhai ah kalpui a ni dawn a, a ching tura thlan bikte hi Horticulture department atangin tanpuina chi hrang hrang – sapthei tiak, a zamna hrui, organic lei tha, urea (NPK), a zamna tur banril, a natna enkawlna damdawi, wood vinegar, a kahna (sprayer), a tang tanna (secateur) a pe dawn a. A phun leh a thlawhfai leh a enkawl chu a chingtute mawhphurhna a ni ang.
Sapthei ching tura thlantehnenah an mamawh hlan
