SASCI sum lapse chhan ber hi Finance-in an la kawl – MNF

Chief minister-in SASCI sum lapse chhana MNF sawrkar a puh chu thudik lo a ni tih MNF party chuan sawiin, ZPM sawrkar hnuaiah Finance department-in he sum lapse chhan ber zawk chu tha takin an la kawl veng veng tih an sawi. MNF Legislature Party (MLP) leader Lalchhandama Ralte chuan chief minister Pu Lalduhoma’n MNF sawrkar lai, kum 2022- 2023 a SASCI Part-I sum, cheng vaibelchhe 200 lapse anga a sawi chu thu dik lo a ni tih a sawi. Hemi kum hian Mizoram tan vbch. 400 sanction a ni a, hna tender vek niin, contractor-ten tha takin an thawk a. He financial year chhung hian 2nd instalment chhuak hman lo mah se, a taka hna thawh a nih avangin vbch.200 hi a kum lehah a hma kuma ‘unpaid bills’ pek nan sawrkar laipuia Finance ministry chuan a rawn pechhuak leh vek a, cheng vbch.400 dawn tur atang hian lapse a awm lo tih a sawi.
Kum 2023- 2024 ah Finance ministry chuan Mizoram tan SASCI Part-I hnuaiah vaibelchhe 500 allocation a pe leh a. A hma kuma unpaid bills pek tlak nan vbch. 200 additional a sanction tel bawk tih sawiin, “He vbch. 200 hi khatih laia CM-in a bika a dil leh Union Finance minister hmaichhana a sawipui anga rawn pek belh a ni a, sum a lapse lo,” a ti.
2023 September 6-ah kum 2023- 2024 atan SASCI Part-I sum vbch. 462.55 dawn a ni a. Hemi atang hian kumin February 2-ah vbch. 414 Mizoram Finance department-in a dawng a, vbch. 200 chu MNF sawrkar laia a hna thawktu implementing department-a pek nghal niin, a bang vbch. 266.69 chu MLA inthlan model code of conduct hman a nih tak avangin Finance department-in a kawl zui ta tih MLP leader hian a sawi.
“2023 December thla tirah ZPM sawrkar a piang a, sawrkar hmasain dan ang thlapa PWD registered contractor a ruatte chu hna thawk hleithei loin an siam a. SASCI guidelines leh sanction terms & conditions-ah state Finance department-in ni 10 chhunga sum hi implementing department kuta pek chhuah tur a tih laiin, ZPM sawrkar chuan 1st instalment sum vbch. 266.69 hi kum 2023- 2024 a liam ni, kumin March 31-ah pawh pechhuak loin a kawl tang lui tlat a. 1st instalment ber a pekchhuah duh loh avang hian 2nd instalment tura sanction thlap tawh vbch. 233.31 chu a lapse ta a ni,” a ti. Contractor-te lungawi lo hi High Court-ah an kal nghe nghe tih a sawi a ni.
Vbch. 233.31 lapse hi a tam tham a, veng leh khaw tam takin an tuar dawn a, he sum atanga hmasawnna ruhrel rotling tam tak siam bakah GST leh labour cess atanga cheng nuai sangbi sawrkarin a chang tur chu duhin Assembly Session-ah MNF member-ten nasa takin an aupui a, chuti chung chuan ZPM sawrkarin a ti lapse lui, tiin MNF MLA-te chuan an sawi.
Tunhma lama ‘SSA sum lapse’ tihah te kha chuan administrative aprroval (AA) hmuh hman ala nih loh laiin, tun tum SASCI sum lapse-ah chuan Finance department atangin AA neih a ni a, chumi mil chuan tender chhuahin contractor thlan an ni a. Finance ministry sanction approval bakah Mizoram Finance department AA awm thlap tawh si, project sum lapse chu thil pawi tak a ni tih an sawi bawk.
Zawhna chhangin MLP member-te chuan, ZPM sawrkar hnuaiah SASCI sum 1st instalment vbch. 266.69 hi kawl beh tlat a ni a, an hman miau loh avangin, tuna lapse ta 2ns instalment vbch. 233.31 hi a rawn kal thei loa, tun thlengin 1st instalment hi Finance department hian a la kawl reng tih an sawi.
SASCI sum chu capital investment tih nan an hmang ngei tih an sawi a. Lirthei luh lohna khaw inkar lirtheia luh theihna siamna atan leh thil dang tangkai tam takah an hmang a, kum khat chhunga hna zaa 75 thawh zawh hman tur a nih avangin project lian pui pui siamna chi a ni loa, khaw tinah an khaw mil tawk zelin mithiamte leh khawtlang hruaituten hna tur hi an ruahman tih an sawi.
MLA-ten an insem darh nia puhna pawh a dik tawk loa, bial tina hmasawnna ruhrel ruahmanna siam a ni mai zawk tih sawiin, SASCI sum hman dan phungah MLA-te insem ngawt theih chi a ni lo tih an sawi a ni.