A ngaihna hre lovin mipui kan hawi kual leh ta he haw mai.
SASCI sum a lapse a, a lapse chhanah sawrkar kal ta hnathawh muan vang a ni, tiin chief minister Lalduhoma chuan a sawi a; thil awmzia a sawifiah a.
Hei hi chhang letin MNF Legislature Party leader Lalchhandama Ralte chuan, ‘thu dik lo a ni’ tiin sawrkar mek chu mawhphurtuah a puh let a; thil awmzia a sawifiah bawk a.
An insawifiahna hi mipui lam chuan kan hre tlang vek tawh awm e; helai hmun zimteah hi chuan chipchiara chip zui theih pawh a ni lo ang a.
He thila inpuhtawnna sum hi, sum leh paia harsa ve tak Mizoram ang tana thil theuneu lo tak ni mah se, a pawimawh ta bera chu, thudik tak hai lan hi a ni.
Tunhma kum 10 vel liam taah khan SSA sum lapse chungchangah khatih laia education minister leh opposition MLA pakhat an inhnial chiam a, MLA atanga ban huam hiala an incho tak avangin a chhui chiang tur ruat a ni ta a. A tu zawk nge MLA atanga bang tur chu ni ta ang tiin mipuiin an ngaichang thuap a. Chhui chianna report a lo chhuak a, a dik lo zawk an awm thei ta lo a, a dik zawk lah awm thei hek suh, 50/50 khan chalrem an ni ta a; mipui lam chu an hrilh a hai hle a nih kha.
Khawiah nge thudik chu?
Tuna SASCI sum lapse chungchangah pawh hian, inpuhtawnna a lo awm leh ta a, a inpuhtawna te hian an tanfung chu dik zawk angin mipui an hrilh ngar ngar zel ang. A chhuitu an awm loh chuan anmahni dik zawk angin leh, a lehlam dik lo zawk angin an insawi tawn ve ve reng mai dawn tihna a ni.
Mipui hian thudik tak hriat hi an right a ni. Tuna inpuhtawn mek political party lian pahnihte hian 50/50 ang vel khan mipui an sirtlukpui ve mai dawn em ni ang, tih chu mipui zawhna a ni.
Dik loh chang a awm thin a, huaisen taka diklohna inpawm hi tlawmna leh chhiatna em em pawh a ni hran lo. Tun thilah hi chuan, dik zawk anga insawi ve ve an nih tawh avangin a hnua a tlawm zawka han tan leh hnuhnawh chu a tu ve ve tan pawh a tlawmthlak tulh tulh tawhin a rinawm.
Eng emaw tihdik tawk loh deuh a lo awm a nih pawhin, mipui laka thiam chan duh vanga thudik tawk lo deuh hmanga inkhuh mawi hram hram tum lo va, ‘kha kha kan lo ti dik zan lo a ni, tun hnuah chuan hetiang thil hi a thleng tawh lovang’ ti ngam thinte chungah mipuiin rinna an nghat duh duh zawkin a rinawm.
SASCI sum lapse chhan… Thudik?
