ZPM sawrkarin dan anga thlapa thlan tawh contractor-te a thawhtir duh loh avangin SASCI sum cheng vaibelchhe 233.31 a lapse tih MNF MLA Robert Romawia Royte chuan a sawi.
Zirtawpnia MNF office Mizo Hnam Runa inkhawmah Robert Romawia chuan, kum liamta 2023- 2024 chhunga SASCI sum vaibelchhe 700 sanction tawhah, vbch. 233.31 a lapse a, 2023 October 6-ah first installment dawn a ni a, thawk tura ruahman tawh chu ZPM sawrkarin sawrkar hmasaa dan ang thlapa contractor a thlante a thawh tir duhloh vang a ni, tiin a sawi. Chief minister-in Assembly House-ah kum kal mekah SASCI-ah cheng vbch. 500 hmu tur angin a sawi a, a taka Mizoram allocation chu vbch. 275 a ni ta si tih a sawi.
Thlei bik nei lo, mipui sawrkar din tura inzuar kha an insawi letling thawkin an khawsa niin a sawi bawk. “VC/LC tih tura langte an party unit ten an khawih zung zung a, mipuiin an ning tan mek. An sawrkar tirha an rikpui hlut Lengpui Airport tih ral pawh a reh leh ta. Kolkata-a Mizoram House hralh chungchang nasa takin an tiri a, mipui tana chhawrnaawm zawk turin House thar Salt Lake-a din tura sawrkar hmasa inbuatsaihna an tiri tel duhloa, mipui rilru a thalo zawnga hruai kawngah an taima hle,” Robert Romawia hian a ti.
Hrilen avanga sum hloh nasa tak MNF sawrkarin a sawi thin leh central atanga puihna an dawn tlem zia chu amah Pu Lalduhawma’n Assembly House-ah a rawn tichiang a. Sum hmuh tura besei atanga hmuh loh zat hi vbch. 2370.80 a ni, tia zawhna a chhan thu a sawi a. Covid vanga puihna central atanga hmuh chu vbch. 90.63 a ni, tia House a hrilh thu a sawi bawk.
Oppostion an nih laia sawrkar sum hmuh a tam zia hahipa an sawi thin laiin, an sawrkar hnu ah sawrkar sum hmuh a lo tlem zia a takin a rawn phochhuak tih a sawi. “Mipui hnena thudik tawklo an thehdarh chu anmahniin an rawn tichiang zel,” MNF MLA hian a ti.
Sum enkawl thiam lo, tia MNF sawrkar sawichhe thintute sawrkar hnu ah, state sum hnar lian ber thin GST-ah 2023 aiin February 2024 ah 14% in sum hmuh a tlahniam nghal a. March 2024 ah 29% a tlahniam leh tih a sawi.
Ramri hung leh FMR tihtawp chungchanga central-in zuam chitin rengin Mizoram a zuam ta chu chief minister dawihzep rah a ni tih MNF adviser hian sawiin, huai taka thu sawi ngam Nagaland CM kan awt ru ta tih a sawi. “Kan sawrkar hian dawih aw pu mah se, MNF chuan huai takin kan bei zel dawn. ZPM sawrkar chu ram tana chhiatna tura an penna kawngah na takin kan do dawn a ni,” a ti.
SASCI sum vbch. 233.31 a lapse – Robert Romawia
