Algerian winger Riyad Mahrez chuan Saudi Arabian club Al-Ahli a zawm fel ta tih kartawp khan Arab team leh Manchester City thu-chhuah chuan an tarlang a, kum 2027 thleng daih contract a ziak.
Al-Ahli lamin an leina man zat hi tarlang lo mah se British media-te report danin Premier League champion hian pound maktaduai 35 (USD 38.53 million) baka a khelh dan azira pound maktaduai nga belh leh tura Saudi club dilna an pawm niin an chhuah hlawm.
Mahrez pawhin thuchhuah siamin, a chhuahsan tak Man-chester City tana a khel thei kha a tan chawimawina leh hamthatna a nih thu a sawi a, a hringnuna hmun lailum chang kumkhua tawh tur leh a hlimawm zawnga a hriat reng tawh tur a nih thu a tarlang tel.
Mahrez hian inelna hrang hrangah City tan khan game 236 a khelh atanga goal 78 tilut tlingin, assist vawi 59 a nei tling bawk. Kum 2018-a Leicester City a chhuahsan hnu khan Etihad club tan trophy 11 a lakpui tling a, chu’ng zinga panga chu league title a ni nghe nghe.
Kum 32 mi hi season liamta khan Pep Guardiola chuan a chhawr rim ta lo deuh a, chutih chungin game 47-ah goal 15 a thun tling a, historic treble an sualchhuahna kawnga inkhel pawimawh pahnih FA Cup leh Champions League final-ah erawh a inlan lo.
Nikum khan a contract neih lai chu kum 2025 thleng atan pawtsei bawk mah se sumtuakna hlawk Arab lamah a insawn ve ta a ni.
Mahrez hi thla hmasa maia Chelsea chhuahsana Saudi Arabia lo thleng hmasa zawk Senegal goalkeeper Edouard Mendy nen team khatah an awmdun dawn.
City hian an midfielder dang Portuguese international Bernardo Silva pawh an mangtha leh a ngai mai thei a, Silva pawh hi Saudi Arabia club Al Hilal lamin an hel mek niin British media report chuan a tarlang.
Kumin January thlaa Al Nassr-in khawvel barakhaih dawt khawpa Cristiano Ronaldo an sengluh hnu khan Saudi Pro league hi Europe-a inkhel thin player-te kal tumna a ni ta fur mek a ni.
Saudi pantu pung zel: Al-Ahli mi thar Mahrez
