Savawm seh enkawlna
senso tumsak vek dawn
Kolasib district Thingthelh khua ami Lalrotluanga s/o Salthangvunga (L) chu a ramvahnaah savawmin a seh a, hliam na tak tuarin a inenkawlna senso ho Aizawl Wildlife Division-in a tumsak vek dawn.
Thudawn danin, Lalrotluanga hi February 2 zing khan Builum lui ramah a kal a. Hetah hian savawm nen intawngin an inbei a, a hmai leh taksa dangah a seh a, aw rawl tawpa au chunga a beih let bawk hnu ah savawm hian a kalsan a ni. Amahin a hliam inbawihsawm chawpin a ram kal puite a fin a, an ni hian Bukpui PHC-ah hruaiin a hliam an lo enkawl hnu ah Synod Hospital Durtlanga enkawl zui tura kalpui a ni.
He thil thleng an hriat ve leh Wildlife Division hian an ngaihven nghal a, Lalrotluanga hliam enkawlna senso zawng zawng hi an tumsak dawn tih thu dawn a ni.
The Aizawl Post-in a zawhchiannaah deputy conservator of Forest Aizawl Wildlife Division Margaret Lalramchhani chuan, heng lai bulhnaiah Pualreng Wildlife Sanctuary a awm a, heng sanctuary bulhnaia ramsa kuttuar an awmin zangnadawmna leh hliam enkawlna senso hi state sawrkarin a tumsak thin hrim hrim a, tunhnaiah sawrkar laipui lamah heti anga fund hranpa awm chu an zu haichhuak a, state sawrkarin ama sum bawm atanga a pek ngai loin, hetiang case bikah hi chuan Wildlife Division hian an ngaihtuah sak thei tih a sawi a ni.
Savawm seh enkawlna senso tumsak vek dawn
