Sawrkar tharin Mizoram tharchhuah sawhthing, aieng, hmarcha leh hmunphiahah minimum support price a puang a, abikin sawhthing hian ngaihven zui a hlawh deuh bik a, social media lamah pawh a langsar ber a tih theih awm e.
Sawhthing rate hi a mumal lo hle a, a chhan pawh a leitute hi state dang sumdawng, sawhthing chingtute dinhmun hrechiang em emtute an ni a. Sawhthing chingtute hrek khawtlaiin, an mangan lai taka man tlawmte tea leisak tumin an châng thin a, sawhthing chingtuten an buaipui nasat ang huin hlawkna an tel ngai lo a ni.
Tuna sawrkar thar hian, sawhthing chingtuten man man zawka hralhna an hriat loh pawha an dehral tho theihna tur kawng hawnsakin ‘in hralh theih loh pawhin cheng sawmngain kan leisak zar zar tawh ang che u’ an ti a ni ber a. Sawrkar tharin sawhthing a leikhawlte hi eng tiangin nge a thehthang zui dawn tih hi chiang faka hriat la ni chiah lo mah se, a thehthang dan tur chu an ruahman fel sa tura ngaih a ni.
Hetih lai hian sawhthing chingtu thenkhat chuan ‘sawrkarin Rs 50/-in sawhthing a lei khawl dawn’ tih chu mawlmang taka an hriat dan a ni a, sawhthing rate a tichhiat an hlau a ni awm e. Hetiang ngaihdan neih hi a awm theih dawn avangin kuthnathawktute hnenah awareness campaign neih a ngai awm mange a tih theih a ni.
Sawhthing chingtuten an sawi hmangin tun dinhmunah sawhthing hi Kg-ah Rs 60 velin an hralh a, kum tin April thla velah a man hi a sang ziah a, Kg khat Rs 100 leh a chunglam a ni tlangpui niin an sawi a; chu pawh a hmunah an rawn la mai thin niin an sawi. Sawhthing chingtu thenkhatin an hlauhthawn chu, sawrkar rate aia sang deuh chauh hian rate hi an rawn bithliah sak mai ang em, tih hi a ni.
Sawrkar hian sawhthing a lei khawlte hi processing plant lama nawr lut lova, a raw-a dehral a tum a nih pawhin, issue rate-ah an fimkhur a ngai dawn hle tih sawhthing chingtute ngaihtuahna atang hian a hriat theih ta a ni.
Sawhthing
