PWD engineer pakhat chuan Aizawl khawpui chhung kawngpui blacktop mek chungchangah tun hnai khan social media-ah thu a post a. “A tha tura kan duan ang hi sawrkar lai ruling party hian min pawmpui thin se kan hna hi a chhe vak ngai lovang. Tunah pawh hian PWD engineer-in kan rawtna angte hotuten min pawmpui a, tiang hian tlan nuam tak blacktop chhah elh awlh chungah kan tlan ta per per a nih hi…” tiin.
He thu post hian ngaihtuah a tithui khawp mai. A awmzia ni ta ber chu, sawrkar hmasate khan engineer-te ruahmanna an pawmsak duh ngai lo a, kawngpui a tha thei lo, tihna a ni ber awm e. Tun sawrkar erawh chuan engineer ruahmanna a pawmsak a, ‘blacktop chhah elh awlh chungah kan tlan ta per per…’ tihna a ni.
Engineer hna hi a chhiat leh chhiat loh hre tur chuan fur hnih-khat han liam se a hriat mai dawn a, “kan hna hi a chhe vak ngai lovang” tih nan a la hma deuh em aw a tih theih.
Engineer pa thusawi hrim hrim lepse-na ni lovin, he engineer thusawi atang hian, kan ram inrelbawl dan hlimthla eng emaw chen chu a chhuidawn theih mai awm e. Engineer berin hetiang thu social media-a a auchhuahpui ngam tawh chuan, a dik ngei turah a ngaih theih ang a. Sawrkar hmasa hunah khan, Aizawl khawpui chhung kawngpui chauh pawh ni lo, khaw kar inkalpawhna kawngpui hrang hrang pawh kha, ‘fur khat daih lo’ tia sawi an ni deuh tlangpui a, a hretute chu mipuite kan ni; a bikin opposition party te an ni lehzual ang. Khatiang hun zawng zawngah te khan, sawrkar lai chuan engineer-te ruahmanna ang lovin engineer-te chu kawngpui an lo siamtir thin tihna a nih hmel a, sawrkar hmasate kha an demawm mai ni lovin, nasa takin ram leh hnam pawi an khawih tihna a ni.
Sawrkar hnathawkte hi a bika thiamna nei an ni a, an thiamna kaihhnawihah sawrkarin ram leh hnam hmasawnna tura thawk turin hlawh tha tak pein a ruai a, politician-ten thil dik lo an tihtir dawn pawha tang-kawh’ tlat ngam tur an ni. Chutiang an ti lo a nih chuan, thil dik lo titute thurualpuitu an ni tihna a ni mai a, thiam chang bik an nihna tur a awm hran awm lo ve.
Sawhthing buaipui dan hi…
