Tun thla February ni 20-a sorkarin sawhthing a lei, khaw pahnih aTanga thawn chhuahte chu a chhe hle tih hmuhchhuah a ni a, a latu Reliance Company chuan sawhthing hi thawn chhunzawm tawh rih lo turin an rawn hriattir a, hei hi ZPM General Headquarters chuan a hnam anga mualphonaah a ngai a, pawi a tiin kuthnathawktute chu inenfiah thuai turin a chah, tiin ZPM Media & Publicity Department chuan nimin khan thuchhuah a siam a.
Social media lamah sawhthing chhia hi a thlalak te pawh phochhuah a ni a, mahse sawhthing chhia hi eng zat vel nge a nih tarlan a ni chiah lo a, thlalak hmuh tur awm chhunte hi chu Kg 4/5 vel ni mai awmin a lang.
Thuchhuah aTanga kan hmuh ang hi chuan, sawhthing chhia hi ‘khaw pahnih aTanga thawn chhuah’ tiin tarlan a ni a. Hetia a khaw hming nen lama tarlan theih a nih danah hian, sawhthing bag pawnah hian sawhthing hralhtu hming leh awmna khua ziah lan zel a ni nge, a lo nih chuan sawhthing chhia lo phumrutu chu zawnchhuah a harsa lo ang a, midang pawhin an tih zel tawh loh nan na taka zilhhau deuh chu a Tha awm mange tih ngaihdan a awm thei awm e.
Sawhthing leitu company te hian, ralkhat aTangin engemaw chhuanlam siamna atan dikhlel deuhvin thil an rawn ti ve thei mai ang em tihte pawh a ngaihtuah tel ve theih rum rum mai.
Eng pawh ni se, mi pahnih khat thil tih dik loh hian a hun leh a hmun azirin a hnam pum huapa hmingchhiatna a thlentir theih avangin, ‘Mizote chu an rinawm’ tih lantir thei tura kan inbuatsaih sauh sauh a pawimawh hle a. Mizoram chhunga thil thleng reng heng corruption hluar em emte pawh hi a hnam anga mualphona a ni a, chutiang zelin thil dang dangte pawh. Kawng hrang hranga hmingchhiatna kan ngah tawh tehlul nen, sumdawnna lama kan sumdawnpuiten insumdawntawnna chhutchah duhna khawpa kan khawsa lehzel a nih chuan, kan thawh rah hi ‘a Tawih’ zel mai dawn tihna a ni deuh ber awm e. Chakai nufa kal dan inzirtir te hi kan iang chho zel ta mai em ni ang tih te pawh a ngaihtuah theih rum rum ta mai!
Sawhthing chhia leh a behbawm…
