Sawhthing grade ‘A’ hralhchhuak tan
Kuthnathawktute kan dah pawimawh
– Agriculture minister
North Eastern Region Agri Commodity e-connect (NERACE) leh Mizoram Agricultural Marketing Board (MAMB) tangdun chuan Champhai district Dungtlang khuaa sawhthing thianghlim leh fai tha, grade-A metric ton 11 chu Hliappui Self Help Group (SHG) VO1 Ginger Processing Unit hnenah Inrinni khan an hralh a. Hliappui SHG hian heng sawhthing hi a tul angin an sawngbawl dawn a ni.
NERACE hian sawhthing bakah hmarcha lei leh hralh thu ah online kaltlanga a leitu tur (buyer) leh a thartu (farmer society) thlun zawm tumin hma a la mek a. Mizoram Agricultural Marketing Board nen thawk dunin Mizoram-in sawhthing a thar chhuah ang angte man man zawka hralh a nih theihnan an ruahman mek tih sawi a ni.
Hetihlai hian Inrinnnia Thenzawl Dragon Fruit Growers & Marketing Society general assembly vawi 4-na a hmanpuinaah Agriculture minister PC Vanlalruata chuan kuthnathawktuten man man zawka an tharchhuah an hralh theihna tura hma lak chu sawrkar tum ber a ni, tiin, “ZPM sawrkar chuan kuthnathawktute a dah pawimawh ber a, kuthnathawktute lamah sawrkar a tang tlat dawn. Thawhhona tha tak neih a pawimawh a a ni,” a ti.
Zau ang zawnga hma lak chu sawrkar auhla a nih angin kalpui an tum tih a sawi a. Sawrkar tan model ni thei tura Lamlian Dung Zaua Thenzawl Dragon Fruit Growers & Marketing Society hmalakna fakawm a tih thu a sawi. Local Soda Pvt.Ltd nen thawh dunna thuthlung an ziak chu lawmawm a tih thu minister hian sawiin, kuthnathawktuten thei leh thlai an tharchhuah chu thei tui emaw wine-a siamchhuah a nih theihnan dan siamthat tum mek a ni tih a sawi a. Food processing lama hma lak an tum dan a sawi bawk.
Thenzawl Dragon Fruit Growers & Marketing Society hi kum 2021 a din a ni a, tunah member 40 an awm mek. Local Soda Pvt. Ltd nen Market MoU kum thum atan an ziak tawh a ni.
Sawhthing grade ‘A’ hralhchhuak tan Kuthnathawktute kan dah pawimawh – Agriculture minister
