Sawhthing leh thlai dang
lei hna society kutah dah
Sawrkar tharin thlai thar lei tur bik a duante chu society-in a lei tura ruahman a ni a, minimum rate duan aia hniama indawr a nih chauhin sawrkar a inrawlh dawn tih Horticulture minister Prof Lalnilawma chuan a sawi.
Assembly Session-ah Horticulture minister chuan sawrkarin sawhthing hi district hrang hrangah society kaltlangin lei a tum a. Khaw tinah emaw district hrang hrangah society dinna tawh phawtah chuan society kaltlanga lei tum a ni tiin a sawi.
Zawhna chhangin, sawhthing bikah sawrkarin kg. ah Rs.50 aia hniam lo turin a ruat a, a sang lam chu duhthusam a ni tih Prof Lalnilawma hian a sawi a. A chingtute leh a leitu tur society an inbia anga, an inbiakna rate ang chuan an lei mai dawn tih a sawi.
Budget-ah a leina an dah dawn a, lei tur chin bituk siam loin duh zat zat minimum rate angin an leisak thei dawn tih a sawi a. “A hranin sawrkarin rate quatation/ tender a chhuah dawn loa, khaw tina society dinte nen an indawrna angin a kal mai dawn a ni. Sawrkar tih ber tur chu rate fix sa aia hniama an indawr a niha inrawlh ve a ni mai,” a ti.
Society hi a din tawhna khua a awm a nih chuan a rintlak dawn em, tih an zirchiang anga, rin ngam an nih chuan an ring mai anga, a thar din tulna khua/ district ah chuan a thar din tum a ni dawn tih minister hian a sawi a ni.
“Khaw khatah society pakhat ding se, sawrkar ruahman sa thlai pali a vaia lei thei tur chu duhthusam a ni a. Thlai mal te tea lei tura an din pawhin hma lak theih chu a ni tho ang,” a ti.
Sawhthing leh thlai dang lei hna society kutah dah
