Sawhthing leisak kan tiam
Kawtkaia lei kan sawi lo
– Lalduhoma
Kum engemawzat atang khan sawrkarna an chang ve a nih chuan kuthnathawktute sawhthing an leisak tur thu an lo sawi tawh thin a, an kawtkaia leisak erawh an tiam ngai lo tih chief minister Lalduhoma chuan a sawi.
Danglam tura beiseitute chu an danglam reng tawh, tia chhangletin Lalduhoma chuan, kuthnathawktute hetianga ngaihsak sawrkar hi an la awm lo tih a sawi. Sundar Ali chauhin a lei theih thin, a ngamna aia sanga lei duhte pawhin an lei theih loh thin Mizorama sawhthing chin chu tunah chuan hmun dang atang pawhin an rawn lei thei ta a, Reliance Fresh nen inremna siamin, sawhthing kg.ah Rs.80 in an rawn lei a, Kolkata-a an outlet 131-ah Mizoram thar sawhthing an zuarchhuak mek tih a sawi a ni.
Reliance Fresh nen hian thlai leh thei dangah pawh inleisak turin MoU an siam a, tum khata lei nghek loin, kartin an la dawn a, hemi atan hian Mizoramah Collection Centre pawh rawn din an tum hial niin chief minister hian a sawi.
Sawhthing hriak sawr tum pawhin an rawn dawt a, Neihloh ramah an inbunna tur ram pek an ni a, an tih theih chuan kum khat chhung vela inbun thei mai tura ngaih an nih laiin, tun thlengin an la ti thei chiah loa, an rin aiin a lo harsa niin a lang tih a sawi bawk.
Sawhthing leisak kan tiam Kawtkaia lei kan sawi lo – Lalduhoma
