Sawhthing sawngbawl project
atan department thawkho ang
Chief minister Lalduhoma hoin Ginger USP Project kalpui dan tur sawiho a ni a. Agriculture minister PC Vanlalruata, Industry minister F Rodingliana, RD minister Prof Lalnilawma, adviser to CM pahnih – TBC Lalvenchhunga leh Dr KC Lalmalsawmzauva bakah a kaihhnawih sawrkar official-te an tel.
Ginger USP Project hi department 5 velin thawkhoin an kalpui dawn a. Champhai Mualkawiah sawhthing sawngbawlna pui ber dah a ni ang. A process-na pui ber, a thlen hmaa lo bunlawkna tur a process-na tenau pathum (spoke hub) – Tualcheng, Zotlang leh Vaphaiah dah a ni ang.
Spoke Hub-ah hian sawhthing tihfai a, hralh nghal chi leh hralh nghal mai chi loh thliar (grading) a ni anga, a channa (slice) a awm bawk anga, a tih rona a awm bawk ang. Chutianga tih theih loh chin, a oil siamna, a branding leh a dangte chu a hmunpui ber Mualkawiah thawh a ni ang.
Kumin chhungin a khawl bun fel hman tum a ni a. A khawl hi sawrkar enkawl loa mimal – investor/ entreprenuers /society enkawltir tum a ni.
Tun tum thutkhawmah hian he project kalpui dan tur indawt leh huntiam neia thawh ngai chi zawng zawng sawi a ni.
Ministry of DoNER chuan Mizoram sawhthing chu Unique Selling Proposition (USP) a pe a, chumi behchhan project – Mizoram Ginger Sustainable Cultivation & Value Chain Development, cheng vaibelchhe 189.78 senna tur siam niin, he project chhunga hmalakna pakhat processing unit dinna tur hi DoNER chuan North Eastern Council-ah vbch. 30.13 a sanction tawh. Sustainable cultivation hi Ministry of Agriculture & Farmers Welfare, Ministry of Rural Development, Ministry of Food Processing Industry, NABARD, ICAR leh IFAD nen thawkhoa kalpui tur a ni.
Ginger USP Project kalpui tur hi a thawhkhatna a ni a. District dangah pawh kalpui zel theih beisei a ni.
Sawhthing sawngbawl project atan department thawkho ang
