Sawrkarin a intiam angin kuthnathawktute tharchhuah sawhthing a lei mek a. Hetih lai hian sawhthing chingtu thenkhat chu, tun dinhmunah sawrkarin an sawhthing chawh sa a leisak theih lawk loh avangin an mangang hle a. Sawhthing rihna a tlakhniam zel avangin an sawhthing dahkhawlte hi an tihral theih hunah pawh an beisei zat chu an hmu dawn lo nasa hle tih an sawi a. An sawhthing atanga an lo beisei ve zat hmuh theih loh an hlauhthawn rualin, a hralh/deh-ral hrim hrim pawh an huphurh tel ta hial niin a lang.
Eng pawh ni se, research based-a kal anga insawi tuna sawrkar mek hian, sawhthing chungchanga an research finding angin thil a kal leh si lo niin an sawi chiah lo na a, hetia sawhthing chawhsa lei zung zung thei lova chawlhsan a han ngai leh rih hi chu, research an kalpui danah ‘fuh zan lo’ hi chu a awm niin a ngaihtheih awm e.
Hetih rual hian, nikum lama agriculture minister leh Mizoram agriculture & allied marketing board chairman ten sawhthing chungchanga hmalak dan tur an lo puanzar zingah khan sawhthing sawngbawlna ‘processing plants’ din tum a nih thu a tel a. Kumin 2025-a sawhthing thar zat tur hi a tam tham dawn avangin “a hringin kan hralh seng dawnin a lang lo a; chuvangin a sawngbawlna (Processing Plants) din turin chak taka hma lak mek a ni” tiin an lo sawi tawh a. Hmun thenkhatah chuan ginger paste leh ginger ale te pawh kalpui tura ruahman a ni, an ti a nih kha.
Sawhthing lei mek a nih lai hian, processing plants buaipui mek a nih thu hi hriat zui tur a awm mumal leh si lo niin a lang a. ‘Chumi hmunah, chumi district-ah, minister-in/bialtu MLA-in etc. sawhthing processing plants dinna tur lungphum a phum’ tih te hi chanchincthar lamah hmuh/hriat tur a awm zur zut tura ngaih a nih laiin, processing plants thawm hi a zawi ru riau niin a lang.
Tuna sawrkar thar hian, sawrkar kal tawh zawng zawng aiin danglamna tam tak a nei a; sawrkar kal tawh ten an tih theih loh engemawzat hun rei lo te chhungin an rawn ti thei mai a, an fakawm hle a. Inthlan dawna mipui hnena an inzawrhnate kha mipuiin tha an tih avanga hetiang dinhmuna hlangkai hi an ni a, chu chu an hriat avangin theihtawpa thaa rorelna hi hlenchhuah tum te pawh niin an la ngaih theih awm e. Chutih rualin, sawrkar kal tate pawhin dem an lo hlawh fo-na, ‘sawi tam, thawk tlem’ ang kha an rawn hnaih thuak thuak ve ta ni te hian a hriat a. |awng umpha turin “talk less and work more” tih hi thuvawna an neih tlat a duhawm hle a ni.
Sawhthing sawngbawlna…
