Sawhthing tâm beihpui thlakna tura Horticulture department hmalakna, ‘Operation Ginger – 2024 Fehchhuah Runpui’ neih tan a ni a. Department official leh thawktu dangten sawhthing chingtute hriat tur an hrilh bakah an loah an kalchilh.District pali – Aizawl, Serchhip, Hnahthial leh Saitual district-a feh chhuak turte chu Horticulture minister Prof. Lalnilawma chuan Horticulture directorate kawt atangin Zirtawpni zing khan a vailiam a. District dang zawng pawhin Fehchhuah Runpui hi anmahni district theuhah an tan ve nghal bawk.
Ruahman dan chuan August chhung hian sawhthing tâmna khua tlawh chhuah a, a invenna leh enkawl dan zirtir hman vek tum a ni. Kumin July tawp khan Horticulture department chuan sawhthing tâm report dawng tanin hma a la nghal a. District tina horticulture officer-ten report an thehluh atanga hriat theih chinah, tunah hian sawhthing tâm avangin khua 263-a sawhthing chingtu chhungkaw 25102 awmin, heng zinga chhungkaw 6586 sawhthing a tam tan mek. Horticulture department-a thawktute chu district tin tuamin an fehchhuak anga, sawhthing natna, a bawmtu rannung leh a enkawl dan inhrilh a ni anga, a enkawlna damdawi pawh ngaihtuah mek a ni.
Horticulture minister chuan sawhthing tâm avanga mangang loneitute tanpui tura feh chhuakte chu theihtawp chhuah tura chahin, a hralhna market thlen hma, a chin leh enkawl chhung zawng chu an department kutah thui tak a innghah avangin thlai chinna hmunah ngei loneitu harsatna enfiahin a remchan dan ang zela puih tum a ni tih a sawi.
Horticulture department chu sawrkarin thlai thar lei tura a thlan pali 4 zinga pathum – sawhthing, aieng leh hmarchate changtu a nih angin, Hand Holding Policy tihlawhtling tura mawhphurhna sang tak nei an ni tih a sawi a. Sawrkar flagship programme tihlawhtling tur leh loneitute beiseina a taka thlen tir tura theihtawp chhuaha thawhhopuiah line department dangte a sawm a ni.
Vailiam zawh ah Prof. Lalnilawma hian Thiaka sawhthing chingtute harsatna tawh dan a hmunah a enfiah nghal a. Tunkar tira damdawi kahin awmzia a nei chu lawmawm a tih thu sawiin, a enkawl zel kawngah mithiamte thurawn ngaichang thiam turin a chah.
Sawhthing tâm tih reh tumin sawrkarin beihpui a thlak tan
