In 80 khua an ni a, in 65 chuan sawhthing hmun an nei. An ei bel ber a ni a, mahse tunlai hian an sawhthing a tam! An mangang a, Lenchim khuaa sawhthing chingtute’n sawhthing chhan tumin theihtawp an chhuah mek.
“Kan mangang a, amaherawhchu, theihtawp kan chhuah a, department lamin min pui a, kan tuar lutuk loh chu kan beisei a,” tiin Cooperative Multipurpose & Farming Society, Lenchim assistant secretary H Lalsangzuala chuan a ti.
Sawhthing hi May velah an ling tlangpui a, December-ah pawh a then chuan an cho tan tawh thin. February atanga May thleng hi a chawh hun tak tak chu a ni. Kum chawhma lamah an cho a, hei hi a hralh hun pawh a ni. An hralh hnuhnun berah hian cheng nuai 100 chuang an lei.
Kumin kum chawhma lamah sawhthing hi kg-ah Rs 60 velin an hralh tlangpui a, Rs 80 han hawlh lai te pawh a nei. A kum hmasaah khan kumin aiin a rate a tha a, kg-ah Rs 100 velin an hralh tlangpui. 2023-ah khan kg khat man Rs 120 kai lai te pawh a awm.
Kuminah May velah an ling a, mahse a tam ta tlat. June thla tawp lamah khan a then chu a tam tawh a, a nasa ta telh telh a ni.
An sawi danin, tam nasa leh nasa lo a awm a, sawhthing hmunah hian fihlim a awm lo ang a, a nasat lohnaah pawh tlem tal chu a tam ang.
Saitual district an ni a, a tam tan tirh atangin district horticulture department nen theihtawp an chhuahho tawh. August ni 16 khan horticulture department lam hian an tlawh bawk.
Cooperative Multipurpose & Farming Society hotute chuan tam belh tawh lo ta se an sawhthing thar tur 30% vel chu an hloh hman tho an rin thu an sawi a, mahse damdawi hmanga an beihna hian rah a chhuah an beisei thu an sawi.
Chutih rual chuan August leh September vel hi a tam nasat hun a nih thu an sawi a, theihtawp an chhuah chungin tun thla leh thla lehah hian a tam nasa ang tih a hlauhawm thu an sawi.
Sawhthing hi an hlawhtlinpui a, 2005-06 vel atang khan khaw mipuiin hna berah an neih tan. Chumi hmaa sawhthing hmun nei tawh pawh an awm. An hna ber, an ei ber a ni mek a, sawhthing hi tih tak tak tlakah an ngai. Sawhthing hmun an nei deuh vek chungin thlai dang pawh Aizawla zawrh tur an thawn thei reng bawk.
Sawhthing tam vangin mangang
