Kuminah Mizoramah sawhthing quintal engemaw zat thar beisei a ni a, mahse nikuma beisei zat aiin kumina beisei zat hi a tlem hle.
Kuminah Mizoramah sawhthing hi quintal nuai 6.65 thar chhuah beisei a ni a, nikuma beisei zat zatve chuang awrh a ni. Mizoram Agriculture Marketing Board hotute’n January ni 22-a thuthar lakhawmtute an kawm tum khan kumina sawhthing thar beisei zat chu quintal nuai 6.65 a nih thu hi an sawi a ni.
2025-a sawhthing thar zat tura beisei kha quintal nuai 11 dawn a ni a, kumina beisei zat hi a tlahniam hle.
Horticulture department-in nikuma an chhut dan khan, 2025-ah chhungkaw 25102-in sawhthing an ching a, an chin zat hi quintal 168583.298 niin, chuta tang chuan quintal 1093299.76 thar chhuah beisei a ni.
Nikuma an chhut dan chuan, Aizawl district-ah quintal 107639.5 thar a beiseiawm a, Lunglei district-ah quintal 74588.7, Siaha district-ah quintal 7562, Champhai district-ah quintal 191407.24, Kolasib district-ah quintal 13563.32, Serchhip district-ah quintal 341840.06, Lawngtlai district-ah quintal 16497.21, Mamit district-ah quintal 17685.52, Khawzawl district-ah quintal 126105.21, Saitual district-ah quintal 149635.9, Hnahthial district-ah quintal 46775.1 thar an beisei. Kumina Mizoram puma thar beisei zat hi nikuma Aizawl district-a thar beisei zat aiin a tlem.
Mizoram Economic Survey 2024-25 bua a lan danin, horticulture department-in 2024 October ni 18 thlenga Mizoram dinhmun an chhutin, sawhthing chin zat hi quintal 1,69,395.72 a ni a, 2024-a an chin hi 2025-a thar kha a ni.
Nikum khan sorkarin sawhthing a lei a, Mizoram Agriculture Marketing Board hotute sawi danin, 2025-a sawhthing lei zat kha quintal 3,47,387.40 a ni. A chi zat aiin a let khat hretin a tam.
Budget Session neih meka zawhna, ziaka chhan chi chhannaah chuan 2024 atanga 2026 January thlenga sawhthing lei zat hi quintal 3,40,098 tih a ni thung a, a lei nan hian Rs 1,41,16,84,410/- sen a ni tih a ni.
Sawhthing thar beisei zat tlahniam nasa
