Lok Sabha chuan Finance Bill 2023 chu official amendment 64 lai, chung zinga long-term tax benefits hnuhkirna tur awmna te leh GST Appelate Tribunal te dinna tur pawh telna chu a pawm fel ta a.
Amendment zingah hian sorkar chuan short-term capital gains neih nana debt mutual fund a tax investment kalpui te pawh a tel a.
Finance Bill hi April 1 qahman tan tur niin opposition member ten Adani group company te JPC (Joint Parliamentary Committee) an ngiat avanga buaina an siam chunga sawiho lova pawm a ni a.
Finance Minister NIrmala Sitharaman chuan sorkar hnathawk te pension enfiahtu tur finance secretary kaihhruaina hnuaiah committee din a ni ang a ti bawk a.
Hei bakah hian Sitharaman chuan Reserve Bank of India chuan foreign tour kaihhnawiha credit card hmanga payment tih te tax laklohna payment te chu a enfel ang a ti bawk.
Finance Bill ah hian official amendment 64 lai a awm a, February 1 khan Parliament ah budget pharh a nih rualin pharh a lo ni sa tawh a.
Budget pawh Ningani khan sawihona awm lova passed in a awm tawh a, tuna Finance Bill pawm takah han amendment siam te nen avaiin section 20 belh tharin a awm dawn a. Finance Bill hi Rajya Sabha pawmpui tura thawn nghal a ni ang.
Zirtawp ni khan House thutkhawm a mumal lo leh hle a, opposotion te chuan lungawilohna lantir zui nghalin tan a nih veleh Lok Sabha chu tihtawp zui nghal a ni a, Rajya Sabha pawh chaw hnu dar 2:30 a tan leh tura tihtawp zui nghal a ni bawk a. Mahse, paper te erawh pharh hman a ni thung a ni.
Opposition ten phut
Opposition party te chu Congress kaihhruaiin Rashtrapati Bhavan atangin a bul hnai Vijay Chowk panin venhimna khauhtak hnuaiah kawngzawhna an nei a. Opposition te hian ‘democracy in danger’ tih banner an tar a. Kawngzawh hnu lawkah MP te chu rut khawmin niin bus hmangin a bul hnai police station panpui zui an ni a. Police te chuan kawngzawh turin phalna an nei lo an ti a, President pawhin anmahni hmu turin huna pe lo an ti bawk.
Opposition party te hian Adani-Hindenburg issue ah Joint Parliamentary Committee (JPC) probe an phut zui zel a, President Droupadi Murmu chu hmuh an ngiat bawk a ni.
Hei bakah hian kum 2019 criminal defamation case a Congress MP Rahul Gandhi thiamloh chantir chu PM Modi thian billionaire industrialist Gautam Adani boruak lakpen tumna tiin an sawi bawk a.
Congress general secretary KC Venugopal chuan Surat court thutlukna siam chu ‘vanduaithlak’ tia sawiin BJP sorkar chuan sumdawng lian Adani-Hindenburg issue aupui hnuah Raul Gandhi an House a thusawi a neih a remti lo bur a ti bawk