Sawiselna karah Thailand-in Uyghur thawn haw

Sawiselna karah Thailand-in Uyghur thawn haw
Mihring dikna chanvo humhalhtu pawlten an thawn kir chuan tihduhdah leh thihna thleng pawhin an tawk thei tiin ngensak mah se Thailand chuan Uyghur hnam mi 40 vel chu China-ah an thawn let.
Heng mite hi Bangkok detention centre-ah kum 10 an awm hnuah Ningani khan China-a Xinjiang region-ah kirtir an ni.
China hi an ram hmarthlang lama Xinhiang region-ah Uyghur mi leh Muslim-te tihduhdaha suatah puh an ni a, Beijing erawh chuan a pha thung.
Tun hi Thailand-in kum 2015 hnua Uyghur a thawn kir lehna hmasa ber a ni.
Thai chanchinbute chuan truck eng emaw zat, thenkhat phei chu a tukverh plastic duma tuam tlatte chuan Bangkok-a immigration detention centre lian ber hi Ningani tuk khan an chhuahsan tih an tarlang.
A hnu darkar eng emaw zatah tracker Flightrader24 chuan duan lawk loh China Southern Airlines thlawhnain Bangkok chhuahsanin Xinjiang a thleng tih a tar lang a. Mi eng zat chiah nge thawn haw an nih hriat theih a ni lo.
Thai sorkar chuan a hnuah China-ah Uyghur 40 thawn haw an nih thu leh kum 10 chuang kawl theihna an nei lo va, ram dang lahin laksak an tum bawk si lo niin an sawi a. Ram dang inrawlh tum lo zingah hian tun hma lama Uyghur lo hum tawh thin, Turkey pawh an tel.
Thailand-ah hian Uyghur pariat an la awm a, an zinga panga hi pawi an khawih avangin lung ina tang lai an ni nghe nghe.
Sorkar chuan tun hnaia Prime Minister Paetongtarn Shinawatra-i’n China a tlawh tum khan Uyghur thawn kirte chu tha taka enkawl turin a ti tih a puang bawk.
Thuthar lakhawmtuten Ningania thawn kir an awm tih an zawhna erawh a chhang lo.
Beijing chuan dan lova Thailand-a lut Chinese 40 lak kir an nih thu a sawi a, Uyghur an nih leh nih loh erawh a sawi lo.
Ningania thawn kirte hi kum 2014-a Xinjiang-a tihduhdah an tawrh hnua tlanchhia, Thai ramria Uyghur man 300 chuang zinga mi an ni.
Tam tak chu Turkey-ah thawn an ni a, kum 2015 khan Thenkhat chu China-ah thawn let an ni a, hei hi sorkar leh mihring dikna chanvo humhalhtu tam takin an sawisel nghe nghe.