Reuben Lalnunthara Hnamte
He thu hian tunlai chu ka rilru a luah deuh reng mai a; social media-te kan thlir thin a, sorkar lai sawiselnate, midang sawiselnate leh fakna lamte pawh kan hmuh chhawk chamchi a. Side A leh B a lo thlir ve phawt a, thutlukna lo siamte a ngaih châng a awm thin. Mahni nihna tak leh hmel tilang ngam lem si lova, midangte sawisel peih tak, politician ropui leh mifel famkim (perfect) leh miffing chungchuang fe fe ni awm tak tak hi social media hian a rawn hring chhuak hnem khawp mai. Ram hruaitu tha leh ringtu tha deuh deuh pawh hi social media lamah hian zâwng ta ila a fuh ang em aw te ka ti thin.
Pathian min siam danah mihringte hian khalhngiltu emaw, sawiseltu hi kan lo mamawh a ni ngei ang. Pathian hian kan chapo hi a hlau khawp, mi chapo hi a tithei miah lo. Bible kan en chuan Pathian khan Abrahama hnenah a thlahte la tamzia tur kha a sawi lawk a, chi tam tak pa a nih tur thute kha. Mahse, fa tak tur ni si lo ngatinge bawihnu lakah Ismaela kha a hrintir kher? Hagari lah kha Vantirhkohte hialin an biain an tanpui hle bawk si a. A chithlah tur dik tak Isaaka a lo piang a, Ismaelate nufa lah chu an hnawtchhuak leh lawi bawk si. Unau karah indona a thlentir a ni ber mai. Jakoba pawh a u Esauva nen an inhua a, an indoa an inhmelmak a nih ber kha. Unau ni si, mizia leh duh dan inang miah si lovin an lo piang bawk a. Lal Davida pawh ama fapa ngeiin a do a, paihthlak tumin nasa takin a phiar a nih kha. Sawi tur tam tak a awm ang; a chhan ber nia lang chu mihirng hian khalhngiltu hi kan lo mamawh a ni. Chapona tlanga kan din leh kan kalsual lohna turin sawiseltu hi kan lo mamawh thin.
Hmanlai lal hote kha an lal em em a, anmahni sawisel leh duh lo deuhtu kha chu an chan kha a chhe viau zel, mahse, khang lalho khan dotu an ngahin an thenawm ramten hneh tumin an dova, an inbuatsaiha an inrin reng a ngai. Lal â deuh, an upate hmang thiam lo leh lal hrawt lutukho kha chuan an daih rei ngai lo a ni. Kan sawi tawh angin hmanlai lalho kha chuan thuneihna an nei sang hle a, thuneihna tawp kha an kutah a awm a, an duh duh an chawisanga, an duh loh zâwng chu an tihlum mai a, tuman an sawisel ngam lo. Khatiang dictatorship rorelna kha mipuiah duhlohna a sang em em tawh a, BC 2500 vel, 5th Century velah khan Greek ram Athens-ah chuan mipui rorelna(Democracy) hi an lo practice tan tawh a, mahse, khawvel pumah a tak tak kalpui a la ni lova, Indopui pakhatna hnu lamah khan mipui rorelna hi a tak taka khawvel puma kalpui tan a lo ni chho ta. Chuti chung pawhin tun thlengin North Korea ram leh hmun tlemteah Dictatorship rorelna hi an la kalpui ta tho a nih hi. Democracy tih hi Greek tawnga Demokratia atanga lak a ni a. Demo tih chu Mipui(People) tihna niin, kratos tih chu inkaihhruaina (rules) tihna a ni bawk.
“Mi sawiselna che chu a dik chuan insiam tha la, a dik loh chuan nui rawh…” Epictetusa chuan a lo ti a. Hringnun hi sawiseltu awm lo chuan a chapo hma em em a; hla pakhat chuan “fakna hi ka tan thlemtu, sawiselna erawh kan thian…” a lo tih kha maw.
Mi tin mai hian khalh ngiltu, thurawn petu hi kan lo mamawh vek mai a. Mahni thlirna mai atang hi chuan kan fo fing zo khawp mai. Chuvangin khawvel mithiam leh mifingten mipui rorelna (Democracy) an lo dinchhuah pawh hi ram rorelnain hma a sawnna tur kawngka leh, mipuite pawhin chanvo leh pawimawhna an lo neih ve theihna tur kawngka a lo ni a. Min dotu leh kalhtu an lo awmte hi a huatthlala duh khawp a, mahse, hengte hi awm lo se finna leh chaknate hi mi tam tak hian kan nei lo maithei a ni. Mihring hian fak hi kan lawm khawp a, a hriat pawh a nuam e. Mahse, a chang chuan he fakna tawngkam tak hian alawm kawng dik lovah min pentir thin leh chapona tlanga min hruai thintu chu. Mi thenkhat phei hi chuan sawiselna hi an han haw khawp a, a sawiseltute hi chu hmelma en hialin an en thin zu nia. Mite thurawn pawh la duh lo, mi ten thu an rawna haw tlat maite hi kan awm tlat thin. Churton Collins chuan “Thurawn zawmtu chu thurawn petu aiin an fing zawk” a lo ti daih mai. Mifing nih duh theuh theuh thurawn tha hi zawm mai ila kan fing a ni mai.
Mihring hi kan inang lova, mi thurawn tha pe ni chuang si lo, sawisel duh hrim hrim hi kan tam hle. Democracy ram angahte hian Ram hruaina kawngah eptu (Opposition) an awm te hi sorkar lai(ruling) khalh ngiltu leh thurawn petu an ni a, an tangkai hle a ni. Ram hruaitute a tua te pawh sawisel duh hrim hrim, ni ve ta se engmah ni lo tur mihring hi kan va tam em! Kohhranahte, pawl ho angahte pawh mahni hotute thiltih dan sawiselna chang hrim hrim, engpawh ti nisela, a sawisel zawnga lo thlir hrim hrim mi hi kan awm bawk a. Heng ang mite hi chu an nun a hah ngawt ang; anmahni pawh hi an inhmu tha chuang lo maithei. Ram hruaitute, mahni hotute diklohna hre tak leh sawisel peih tak hruaitu nih khel reng reng hote hi hruaitu dinhmuna an din hian hruaitu hlawhchham an ni duh chawk. Pathian hian kan mizia hi min han lepse duh ve ta ang se; big screen-in han tilang uarh mai se chuan hmu ngam lo fe fe chu kan tam hle awm e. Political party tin mai hian thil tum, kan ram tana hmasawnna tur an nei theuh; mi chak deuh leh thiltithei deuh erawh an awm. A tihsual tirtu leh lo khalhkawitu erawh party worker-te leh mipuite kan ni fo.
Zoram kohhran hrang hrangte pawh hi kan inenlet a ngai khawp mai; kohhran ropui leh hauhsak kan duh luat vang hian Pathian pawi kan khawih thei. Sorkar Deprtment hrang hranga hlemhletna tamzia pawh kan hria a. Mahse, chung mite chu kan kohhran hnarkaitu leh mi pawimawh tak tak an tel ve nual lawi si. Kan Chief Ministerin a office a luah tantirha a thusawiah pawh khan kan ram chhunga hlemhletna tamzia kha a rapthlak hlein a sawi a nih kha. Engatinge kan ram ringtu tamna ram leh kohhran thatna ramah si hian heti em a thil dik lo leh tha lo kan hnawl ngam loh le? Lal Isua hian kohhran tin mai te hi rawn endikna (Inspection) hi rawn nei ta se, phuar tur an tam awm mang e. Mipuite hian kan ram hi dikna nena khalh ngil turin tan i la ang u hmiang. Hruaikawitu, sawiseltu ngawt ni lovin, khalhngiltu nih i tum theuh ang u.