National Health Mission kaltlanga Mizoram sawrkar hnuaia thawkten thil phut neia lungawiloh lantir an tum chu state sawrkarin hma laksak a intiam avangin an thulh.
NHM Employees Union Mizoram (NEUM) thuchhuah siam tawh danin, Mizoram sawrkarin kumin June 18 khan centrally sponsored scheme-a thawkte tan regularization/regular appointment hauhsak tur gazette notification a tichhuak a. Hetihlai hian Health & Family Welfare department hnuaia regular post lak tur thenkhat – health worker, staff nurse, laboratory technician, x-ray technician adt. ruahmanna siamah NHM (National Health Mission) hnuaia staff-te tana hamthatna awm thei lo zawngin a thar vek lak tura department atangin rawtna a awm a ni.
Gazette notification awm tawh sa ang hian Health & Family Welfare department-a vacant post awm zawng zawng 70% tal, NHM hnuaia kum 10 thawk tawhte tan, anmahni corresponding post theuhah regularise nise, NHM hnuaia contractual-a kum 10 chuang thawk mek, H&FW department-a corresponding post neilo tan special post (temporary post) siamsak a, regularise an phut tih an sawi a ni.
An thil phutah hian sawrkarin hma a lak loh chuan September 26-28 chhung badge dum bela lungawilohna lan tir a, hma an sawn loh chuan kal zel dan tur ngaihtuah an rel a ni.
NEUM hruaitute hian Health secretary hoin an thukhawm a. An thil phut chu hmalakna kal mek a nih thu leh theihtawp chhuahpui an intiam avangin badge dum bel an tum hi thulh rih nise; an beisei anga hma lak a nih loh chuan kal zel dan tur rel nise, an ti.
Sawkar intiamna avangin NEUM-in lungawiloh thulh
