Tunhma khan sawrkar enkawl damdawi in leh sawrkar enkawl school-te khan private enkawl damdawi in leh private school-te a tluk lo thin a. Khaikhinna pakhat chu – Sawrkar damdawi ina thawktute hlawh a tam zawk a, infrastructure pawh a changtlung zawk, mahse thawktu hlawh tlem zawk leh infrastructure pawh changtlung lo zawk private hospital-ten pan an hlawh zawk a; dawmdawi in awm man leh inenkawlna senso sâng zawk hle mah se, mirethei zawkte pawhin puk chawp pawhin private damdawi in an pan tawk tawk thin. Zirna school dinhmun pawh, damdawi in ang tho hi a ni.
Hun a lo kal zel a, sawrkar pawhin sawrkar awm chhan ‘mipuite’ hamthatna ngaihpawimawhna a rawn nei lian chho zel a, tunah chuan sawrkar damdawi in te leh sawrkar school ten hma an sawn chho ta zawt zawt mai. He hmasawnna hi thawklehkhata lo awm thut a ni hran lo a, zawi zawia rawn insiam (transform) chho a ni tiin a sawi theih ang a; chutih rualin, inrelbawlna tharin a hrin chhuah tam tak pawh a awm bawk ang.
Tun dinhmunah chuan, abikin Civil Hospital, Aizawl phei hi chu tunlai hmanraw changkang ber bera thuam chhoh mek a ni a. Nimina health minister-in MJA puala free health check-up a hawnnaah, sawrkarin civil hospital a thuam that chhoh mek dan a tarlang a. Chung zingah chuan ‘kidney transplant’ (Kal thlak) tih theihna tur te a tel tawh a, lung natna enkawlna Cath-Lab (catheterization laboratory) te; tin, ZMC&H-ah lung zai theihna turte pawh buatsaih mek a ni a. Lung zai phei chu private hospital-a cheng nuai 8 chuang sen a ngaih laiin sawrkar damdawi inah chuan cheng nuai 1.5 vel lekin a zai theih dawn nghe nghe a. Tunhmaa phai lam pan a ngaih thinna tam tak kha tunah chuan mahni kawtkaiah cheng tlemte senga pan theih a lo ni ve dawn ta reng mai. Mizoram Universal Health Care Scheme hnuaia inziak lut te phei chuan a thlawn liau liauvin damdawia inenkawlna hi an dawng dawn a ni. Hetia sawrkar damdawi in a changtlung chho zel hi, Mizoram hmasawnna mellung pawimawh tak pakhat a tling ngei ang le.
Sawrkar damdawi inte an changtlung chho zel a nih chuan, tunhmaa phai lama in refer a ngaih thinna ang kha a tam zawk chu mahni kawtkaiah a tih theih tawh dawn tihna a ni a. Chu chuan state danga mipui sum cheng vaibelchhe tel liam thla hum hum thin kha a hum (save) thei tawh dawn tihna a ni. Heng medical equipment changkang tak taka sawrkarin sum tam tak a senna hi investment tha leh awmze nei, insensona tha a ni. Mihring kan hrisel that phawt chuan hmasawnna pawh a chak sauh dawn a ni.
Sawrkar damdawi in leh a behbawm…
